Жұмысқа тұрудың жаңа тәртібі

«ҚТЖ – Жүк тасымалы» ЖШС «Жамбыл ЖТ бөлімшесі» филиалында сыбайлас жемқорлыққа жол бермеу мақсатында жұмысқа алу тәртібі автоматтандырылған жүйеге көшірілген.

Мамандар кадр бөліміне келмей, арнайы «Job.railways.kz» сайтына тіркеліп, құжаттарын тапсырып, өтініш бере алады.  

«AMANAT» партиясы Жамбыл облыстық филиалы жанындағы Сыбайлас жемқорлыққа қарсы іс-қимыл жөніндегі кеңес отырысында «ҚТЖ» ҰК» АҚ Жамбыл өңірі аумағындағы құрылымдарда сыбайлас жемқорлыққа қарсы іс-қимыл жұмысының жағдайы қаралды. Жамбыл филиал директоры Айдын Сеитбенбетов филиалда осы бағытта атқарылып жатқан жұмыстардың барысын баяндады.  

Директордың айтуынша, мекеме қызметкерлері мен жұмысқа қабылданушы арасында ешқандай байланыс жоқ. Тек қана соңғы кезеңде ғана сұхбат алу үшін шақыртылады. Әңгімелесу барысында жемқорлық әрекетін болдырмау үшін аудио және видео бақылауымен таспаға түсіріледі екен.  

Дерекке сүйенсек, соңғы бес жылда Жамбыл жүк тасымалы бөлімшесі филиалында Сыбайлас жемқорлық әрекеттерге бірқатар мекеме қызметкері жол берген. Олар мемлекет тарапына келтірген шығындарды өтеп, заң алдында тиісті жауап берген. Осы кемшіліктерді ескере отырып, Жамбыл бөлімшесі филиалы бүгінде сыбайлас жемқорлықпен жұмысты күшейтіп, қызметкерлерді арнайы оқыту курстарына жіберіп, ақпараттық-түсіндіру шараларын өткізуді күшейткен.