Ақтөбеде тағы бір рельс зауыты салынады
Ақтөбе облысы бойынша меншікті тілші
Ақтөбеде рельс өндіретін тағы бір зауыттың құрылысы басталды. Жаңа зауыт жобасы «Қазақстан темір жолы» АҚ-мен жасалған оффтейк-шартпен қамтамасыз етілген. Бұл өнімнің ішкі нарықта тұрақты өткізілуіне кепілдік береді.
Ұзын өлшемді рельс шығаратын рельс дәнекерлеу зауытының құрылысы басталғаны туралы хабарлаған ресми мәліметке сүйенсек, кәсіпорын жылына 825 шақырымға дейін рельс өндіруге қауқарлы. Жоба Қазақстанның теміржол инфрақұрылымын жаңғыртудағы маңызды кезеңдердің біріне айналады деп сенеді.
Жаңа зауытқа тартылған жалпы инвестиция көлемі 21,4 млрд теңгені құрайды. Зауытты іске қосу 2026 жылға жоспарланған. Сол кезде 200-ден астам жаңа жұмыс орнын ашуға мүмкіндік береді.
Жергілікті әкімдік таратқан ақпаратқа сүйенсек, жаңа өндірістің басты ерекшелігі – рельс ұзындығы 800 метр болады. Бұл қазіргі қолданыстағы стандарттардан едәуір артық. Мұндай рельстер темір жолдарды айтарлықтай жақсартады деп күтілуде. Сапалы рельс пойыз қозғалысы кезінде соққы мен дірілді азайтады, жылжымалы құрамның қызмет ету мерзімін ұзартады және жолаушылар үшін жайлылық деңгейін арттырады.
Жаңа өндірістің тағы бір стратегиялық артықшылығы – зауыттың 120 метрлік рельстер шығаратын Ақтөбе рельс-арқалық зауытына жақын орналасуы. Бұл логистика мен тасымалдау шығындарын оңтайландыруға мүмкіндік бермек. Сонымен қатар, кәсіпорынның шекараға жақын орналасуы экспортқа жол ашады.
Қазіргі уақытта өңірде құрылыс-монтаж жұмыстары, жабдықтарды жеткізу, алаңды жайластыру және негізгі өндірістік пен әкімшілік нысандарды салу жұмыстары қайнап жатыр.