Теміржолшы отбасы жеңімпаз атанды
Түркістан облысы бойынша меншікті тілші
Шымкентте «Мерейлі отбасы» байқауының қалалық кезеңі қорытындыланып, онда теміржолшылар отбасы жеңімпаз атанды. 20 отбасы арасынан үздік атанған Нұртаевтар әулеті енді қыркүйекте Астанада өтетін республикалық кезеңге жолдама алды.
Бүкіл өмірін теміржол саласына арнаған Нұрғали Нұртайұлы оңтүстікте ғана емес, республикаға танымал теміржолшы. Кезінде ақ адал еңбегімен даңқы шығып, аты аңызға айналған азаматтармен қатар еңбек еткен ол бүгінде шымкенттік теміржолшы-ардагерлер арасында белсенді зейнеткер. Саламатты өмір салтын ұстанып, ұрпақтар сабақтастығын жалғап отырған қарияның ғұмыры көпке үлгі боларлық.
Ізгілікті насихаттап, ұлттық құндылықты өнеге еткен Нұртаевтар әулеті ойласа келе осы байқауға қатысуға шешім қабылдаған. Ұйымдастырушылардың айтуынша, байқауға қатысуға қаладағы 5 ауданнан 189 өтінім түскен. Соның ішінен 20 отбасы іріктелген. Бас-аяғы бір жарым айға созылған сан түрлі іріктеу кезеңдерінен сүрінбей өткен Нұртаевтар әулеті республикалық байқауда Шымкенттің намысын қорғауға лайық деп танылған. Негізінен, ұлттық құндылықтарды ұстанған отбасыларды дәріптеуді мақсат еткен бұл жоба биыл 12-ші рет өтіп отыр екен. Биылғы жылды Мемлекет басшысы «Жұмысшы мамандықтар жылы» деп жариялауына орай, осы санатқа сай келетін отбасыларға көбірек көңіл бөлінген көрінеді.
Сонымен қатар үміткерлердің Шымкент қаласының дамуына қосқан үлесі мен балаларының жетістіктері де назардан тыс қалмаған. Ал Нұртаевтар әулетінен тараған ұрпақтың көпшілігі – нағыз теміржолшылар. Әулеттің бұл саладағы еңбек өтілінің жалпы жиынтығы 407 жылды құрайды. Түлкібас ауданының Састөбе ауылында туып-өскен Нұртай ақсақалдың жары Әсия мен қос інісі Мырзағали, Мырзабек те өмірін осы саламен өрбіткен жандар. Ал ұлы Болат пен қыздары Жанат, Ләззат, немерелері Нұрсұлтан мен Дастан, Дәулен және Досбол, Ақтолқын да ата салған сүрлеу-соқпақпен жүріп келеді.
Осылайша, отбасы институтын нығайту әрі өскелең ұрпақ бойында патриоттық сезім қалыптастыруды көздейтін байқауда жеңіске жеткен теміржолшылар әулеті бағалы сыйлық пен қаржылай жүлде қорының сертификатына ие болды. Алда Астана сапары...