Теміржолшы мамандығына грант саны артуда
Маңғыстау облысы бойынша меншікті тілші
Ақтау қаласындағы М.Тынышбаев атындағы Ақтау ALT көлік колледжі теміржол мамандықтары бойынша бес бағытта білім береді. Өткен жылы 140-қа жуық студент теміржол мамандықтарын алып шықса, биыл білім ордасы екі жүзге жуық грант бөліп отыр.
Колледждің қабылдау комиссиясының жауапты хатшысы Шынар Жұмабекованың айтуынша, осы оқу жылында жалпы сегіз мамандық бойынша 375 мемлекеттік грант бөлінсе, соның 175-і болашақ теміржолшыларға арналған. Теміржол бағытында берілген гранттың ішіндегі басымдылық «Теміржолдың тартқыш жылжымалы құрамын пайдалану, жөндеу және техникалық қызмет көрсету» мамандығына берілген. Яғни бұл бағытта білім аламын деушілерге 75 грант қарастырылса, 11-сыныпты бітіріп оқуға тапсырушылар үшін «Теміржол құрылысы, жол және жол шаруашылығы» мамандығы бойынша 25 грант берілген.
– Өткен жылы білім ордасынан 138 студент теміржол мамандықтарын алып шықты. «Теміржолдың жылжымалы тартқыш құрамын пайдалану, жөндеу және техникалық қызмет көрсету» бағытында 46 студентке техник-электромеханик біліктілігі берілді. Тағы 35 түлек теміржол көлігінде тасымалдауды ұйымдастыру және қозғалысты басқару мамандығын меңгеріп, тасымалдауды ұйымдастырушы техник біліктілігін алды. Автоматика, телемеханика және теміржол көлігінде қозғалысты басқару бойынша 29 шәкірт, Теміржол құрылысы, жол және жол шаруашылығы мамандығына сәйкес 11 студент оқу бітірді. Теміржолдың вагондар мен рефрижераторлы жылжымалы құрамдарын пайдалану, жөндеу және техникалық қызмет көрсету мамандығы бойынша 17 студент түлеп ұшты. Солардан бүгінгі күні бізге өздерінің хабар беруі бойынша бірнеше шәкіртіміз жергілікті теміржол мекемелерінде жұмысқа орналасты. Атап айтсақ, Нұрсұлтан Елубаев есімді студентіміз Маңғыстау теміржол бөлімшесінде тепловоз машинисінің көмекшісі болып жүр. Бекжан Оңбаев деген шәкіртіміз Маңғыстау магистральдық желі бөлімшесінде №10 бекетте СОБ электромонтері болып еңбек жолын бастады. Бағдат Жұмағали есімді түлегіміз «Otpan Logistic» ЖШС жолаушылар вагонының жолсерігі жұмысына орналасты. ҚТЖ ұлттық компаниясы мен колледж арасындағы меморандумға сәйкес шәкірттеріміз қазір жұмысқа орналасып, еңбек жолдарын бастап жатыр, – дейді колледж директорының өндірістік жұмысы жөніндегі орынбасары Берік Аманиязов.