Мемлекеттік марапат табысталды

Қазақстан Республикасы Конституциясының мерейлі 30 жылдығына орай Атырау өңірінде бірқатар еңбеккерлер мемлекеттік наградамен марапатталды.

Солардың ішінде қос теміржолшы да жоғары мемлекеттік наградаға ие болып, кеуделеріне орден мен медаль тақты. Облыстық әкімдікте өткен салтанатты жиында Атырау магистральдық желі бөлімшесіне қарасты Ақжайық белгі беру және байланыс дистанциясының аға электромеханигі Бекқали Бимырзаұлы Қайнарбаев «Құрмет» орденімен марапатталды.  

Ол еңбек жолын өткен ғасырдың 80-ші жылдарында Жантерек станциясында жолшы болып бастаған еді. Отан алдындағы борышын өтеп келген соң Ақжайық сигнализация және байланыс дистанциясының Мақат – Сағыз учаскесіне электромеханик болып жұмысқа тұрады. Осы мамандық бойынша Ақтөбе теміржол колледжін бітірумен қатар Свердловск жол-техникалық мектебінде оқиды. Бекқали 1986 жылдан бастап осы уақытқа дейін ШЧ-8-ге қарасты Жантерек – Мұқыр – Сағыз станциялары аралығындағы учаскеде аға электромеханик қызметін атқарып келеді.  

Ал Саламат Кекілбаев «Ерен еңбегі үшін» медалімен марапатталды. Ол да еңбек жолын Мақат станциясында жол жөндеуші болып бастаған. Әскер қатарынан келген соң локомотив депосында жөндеуші слесарь, машинист көмекшісі, машинист, содан соң технолог, инженер болып еңбек етеді.  

Ал 2006 жылдан бастап күні бүгінге дейін Мақат қалпына келтіру пойызының бастығы қызметін атқарып жүр. М.Тынышбаев атындағы теміржол академиясын локомотив шаруашылығы мамандығы бойынша бітірген. Екі азаматтың да 40 жылдан астам еңбек өтілі бар, өлке темір жолының дамуына қосып келе жатқан үлестері де мол. Бірі байланыс саласындағы жаңашылдықтарды меңгеріп, оны өндіріске енгізсе, екіншісі апатты жағдайда шұғыл әрекет етіп, қозғалыс қауіпсіздігінің сақталуына еңбек сіңіріп келеді.  

Қос теміржолшыға мемлекеттік награданы облыс әкімі С.Шапкенов табыс етіп, зор денсаулық, отбасына амандық, еңбекте мол табыс тіледі.