Вокзалдағы қондырғылар ауыстырылды
Атырау облысы бойынша меншікті тілші
Атырау өңірінде вокзалдарды қайта жаңғырту жұмыстарының жасалуына байланысты вокзал ғимаратында орналасқан орталықтандырылған электрлік жүйелерін көшіру жұмыстары жүргізіліп жатыр.
Атырау магистральдық желі бөлішесінің бастығы Аралбай Қосымбаевтың айтуынша, мұндай жұмыс алдымен Бейнеу вокзалында басталған. Яғни ШЧ-11 Құлсары белгі беру және байланыс дистанциясына қарасты орталықтандырылған электрлік пост құрылғыларын станцияның әкімшілік ғимаратына көшіру жұмыстары ШЧ-8 Атырау, ШЧ-9 Ақжайық және ШЧ-11 Құлсары белгі беру және байланыс дистанциялары қызметкерлерінің біліктілігі мен ұйымшылдығы арқасында тиянақты жасалған. Нәтижесінде 40 күнге жоспарланған жұмыс 24 күн ішінде мерзімінен бұрын толықтай аяқталып, электрлендірілген орталыққа берілген.
Осындай жұмыстар енді Исатай, Мұқыр, Жамансор станцияларында да жүргізіліп, ондағы ЭО қосындары модульді ғимаратқа көшірілуде. Сонымен қатар станцияларда ескі қондырғыларды жаңарту жұмыстары да жүргізілуде. Мәселен Атырау, Махамбет, Мақат станцияларында орталықтандырылған электрлік қосынындағы тозығы жетіп, көнерген ПВ-60 қондырғыларын заманауи үлгідегі ЩАВР, ЩР, ЩП типті қоректендіру қондырғыларына ауыстыру жұмыстары жүргізілді. Бұл әрине бұрмалар мен бағдаршамдардың, жалпы автоматикалық белгі беру қондырғыларының жұмысын жақсарта түседі.