Семейлік теміржолшылар 5 мың түп көшет отырғызды
Абай облысы бойынша меншікті тілші
«ҚТЖ» ҰК» АҚ – Семей магистральдық желі бөлімшесінің теміржолшылары Ұлттық компания бойынша өтіп жатқан «Taза Қазақстан» республикалық экологиялық акциясы аясында кең ауқымда іс-шара өткізді.
Семейліктер экочелленджді Қарағанды магистральдық желі бөлімшесіндегі әріптестерінен қабылдап алды. Жалпы, кең көлемдегі көшеттер отырғызу, аймақты жасылдандыру ісі осыдан біраз жыл бұрын қолға алынған еді. Қарағайлы орманның іргесінде орын тепкендіктен жасылдандыру ісі бөлімше бойынша дәстүрге айналған. Осыған дейін де республикалық акция аясында әкімшілік ғимараттардың, модульдік үйлердің, материалдық базалардың және теміржол вокзалдары мен станциялардың айналасы көгалдандырылған болатын. Дегенмен, бұл акцияның семейліктер үшін маңызы зор болып отыр.
Осынау ерекше акция барысында Жаңа-Семей – Дегелең телімі бойынша ауқымды көгалдандырудың негізі қаланып, ағаш отырғызу жұмыстары жүргізілді. Теміржол желісінің жиегінде қар үйінділерін болдырмау мақсатында қаладан Астана бағытына шығаберіс желі бойына ағаштар егілді.
Салалық ардагерлер кеңесінің төрағасы Қырықбай Әлсейітұлы акцияға арнайы келіп қатысып, магистральдықтар бастамасына қолдау білдіріді. Акцияға ПЧ, ШЧ, ЭЧ және вокзал шаруашылығының қызметкерлері белсенді түрде қатысты.
Берекелі іс-шара соңында Семей НЖС-6 директоры Айдын Шәукежанов экологиялық челлендж эстафетасын Атырау магистральдық желі бөлімшесінің ұжымына жолдап, батыстағы әріптестерін таза және жасыл Қазақстанды бірлесіп құру бастамасын жалғастыруға үндеді.
Айта кетер жайт, бір бұл емес, НЖС-6 бөлімшесіне қарасты мекемелер де өзара экоакция өткізіп жатыр. Дәл осы күні тайлы-таяғымен желі бойына көшеттер отырғызуға шыққан ПЧ-39 мекемесінің жолшылары бірегей эстафетаны Жаңа-Семей жол дистанциясындағы әріптестеріне ұсынды. Бұл шара қарашаға дейін жалғасып, күллі шығыс өңірді толық қамтымақ. Ал осы жолы байтақ бөлімше бойынша жалпы саны бес мыңнан астам көшет отырғызылыпты.