Тазалық акциясы тоқтамайды
Қызылорда облысы бойынша меншікті тілші
«Таза Қазақстан» экологиялық челенджін атыраулық әріптестерінен қабылдап алған Сыр елінің теміржолшылары тайлы-таяғы қалмай жасыл сенбілікке шықты.
Теміржолшылар бұл жолы Қызылорда локомотив пайдалану депосының ауласында орналасқан Отан қорғаушылар аллеясын таңдап, оны жандандыруға кірісті. Атшаптырымдай депо ауласына Сырдың табиғатына бейімделген терек, қарағаш сынды 70 түп көшет егіліп, бұрынғы тал-дарақ қырқылып, қуарғаны кесіліп, айнала төңірек тазартылып, қоқыс шығарылды. Жалпы акция аясында аймақта 2264 дана көшет отырғызу жоспарланған. Ағаш отырғызылып қана қоймай, әрі қарай оған күтім жасау, суару жауапкершілігі де нақты белгіленді. Бұл – ұзақ мерзімді жасыл мұра жоспары.
Бөлімше директоры Батырхан Базарбаев, бас инженер Күлхан Белкібаев, «Қазкөліккәсіп» ҚБ филиалының төрағасы Бауыржан Ахметов, кәсіподақ ұйымының төрағасы Мұхтар Көпірбаев, депо бастығының орынбасары Қаныш Өтеген, Қауіпсіздік және еңбек қорғау, экология бөлімінің басшылары Әзімхан Жиенбаев, Ғалия Көпжасарова, Қызғалдақ Оспымбетова бастаған жүз қаралы адам қолдарына құрал алып, жасыл желекке жан бітірді.
– Бұл сенбілікте біз тек көшет отырғызып қана қойған жоқпыз. Біз болашаққа үміт ектік. Әр көшет – ертеңгі ұрпаққа қалдырған аманат. Сондықтан бұл тек экологиялық емес, рухани мәні бар акция, бұл жерде формализм жоқ. Мұнда шын ықылас, шынайы еңбек, туған топыраққа деген құрмет бар, – деді бас инженер Күлхан Шапайұлы.
Экологиялық эстафетаны атыраулық әріптестерден қабылдаған қызылордалық теміржолшылар оны Жетісу өлкесіндегі Достық станциясына жолдады.