Ортақ жеңіс, ортақ абырой
Қызылорда облысы бойынша меншікті тілші
Жуырда өткен «Жас үздік маман-2025» V республикалық кәсіби байқау қорытындысы аймақ теміржолшыларына қуаныш сыйлады. Қызылорда магистральдық желі бөлімшесінде еңбек ететін бірнеше маман үздіктер қатарынан көрінді.
Кәсіби конкурстың «Вокзал бойынша кезекші» номинациясында Арал теңізі вокзалының кезекшісі Зәмзәгүл Қарақұлова республикалық деңгейде 1-орынды иеленіп, аймақ абыройын асқақтатты.
Жолаушыларға қызмет көрсетуде жоғары сервис пен сапаны жоғары қойған Зәмзәгүлдің сонау Арал теңізіндегі үлгілі еңбегі еленіп, лайықты бағасын алды.
«Жол шебері» номинациясы бойынша Қызылорда жол дистанциясының жол шебері Жалғас Якубов та республикалық бәйгеде 1-орынды иеленіп, кәсіби шеберліктің биік үлгісін көрсетті. Жалғас – нағыз теміржолшы. Ол үшін әр шпал, әр рельс-пойыздар қозғалысының қауіпсіздігіне кепіл болатын сенім сызығы. Жол шеберінің міндеті қозғалыс қауіпсіздігінің мүлтіксіз сақталып, пойыздардың апатсыз жүрісін, қамтамасыз ету десек, Жалғас – осы деңгейден табылып отырғанын іспен дәлелдеген өз ісінің майталманы.
Сондай-ақ Қазалы жол дистанциясының жол шебері Бауыржан Қыпшақбаев конкурста 2-орынды иеленді. Оның жетекшілігіндегі телімде қозғалыс қауіпсіздігі әрдайым жоғары деңгейде. Тәжірибелі шебердің жұмысы – жас мамандар үшін нағыз өнеге мектебі.
Қызылорда магистральдық желі бөлімшесінің директоры Ербол Сәулебеков бастаған аймақ теміржолшылары, кәсіподақ жетекшілері Астанадан оралған жеңімпаздарды салтанатты түрде қарсы алып, құрмет көрсетті. Кәсіподақ ұйымы тарапынан алғыс хат пен марапаттар табыс етілді.
– Құрмет төрінде тұру оңай емес. Ол – жылдар бойғы маңдай тер мен кәсібіне деген адалдықтың нәтижесі. Әріптестеріміздің бұл жетістігі – бүкіл аймақ теміржолшыларының ортақ жеңісі, ортақ абыройы, – деді бөлімше басшысы.
