Вокзал маңы абаттандырылды
Атырау облысы бойынша меншікті тілші
Тоғыз жолдың торабы Мақат станциясында «Таза Қазақстан» республикалық экологиялық акциясы аясында және Қазақстан кәсіподағы қозғалысының 120 жылдығына орай сенбілік ұйымдастырылды.
Санитарлық тазалықты сақтау және экологиялық мәдениетті арттыру мақсатында өткен акцияға Атырау магистральдық желі бөлімшесіне қарасты мекемелердің алпыстан астам жұмысшыларымен қатар зейнеткерлері де белсенді түрде атсалысты.
Акцияға қатысушылар Мақат вокзалы маңын тазалап, оның айналасына 50-ден астам көшеттер отырғызды. «Акцияның мақсаты – қоршаған ортаны таза ұстап, ағаштар, теректер отырғызу, жасыл аймақ құру. Әрине Мақат мұнайлы аудан, мұнда экологиялық проблемалар бар, сондықтан ағаш отырғызу және парниктік газ шығарындыларын азайту климаттың өзгеруімен күресуге көмектеседі. Әзірге елуден астам терек отырғыздық, алда бұл жұмыстар тағы да жалғасын табады» дейді бөлімше кәсіподақ ұйымының төрағасы Марат Бисенғалиев.
Вокзал маңы абаттандырылған сенбілік соңында ерекше белсенділігімен көзге түскен жұмысшылар мен зейнеткерлер бөлімше басшысының Алғыс хатымен және арнайы сыйлықпен марапатталды.