Республика күні мерекесінде теміржолшылар марапатталды

Мерейі биік мемлекеттік мереке – Республика күніне арналған салтанатты жиында «Жамбыл жүк тасымалы бөлімшесі» және «Жамбыл магистральдық желі бөлімшесі» филиалдарына қарасты еңбек ұжымдарында өз міндеттерін жауапкершілікпен атқарып жүрген мамандар марапатталып, құрмет пен қошеметке бөленді.

Соңғы жылдары айтулы мерекеге орай саланың дамуына зор үлес қосып, адал еңбегімен көзге түскен теміржолшыларды «Темір жол даңқы», «Адал еңбегі үшін», «Кәсібі бойынша үздік», «Үздік жол шебері», «Үздік жас маман», «Үздік машинист» төсбелгілері, «Қазақстан темір жолы»  ҰК» АҚ басқарма төрағасының Құрмет грамотасы және Алғыс хаттарымен марапаттау дәстүрге айнала бастады. Биылғы салтанатты жиынның мәні мен мазмұны да өзгеше. Патриоттық әндер шырқалып, ерекше көңіл күйге бөлеген форматы бөлек мерекелік іс-шарада «Жұмысшы мамандықтары жылы» және теміржолшылар кәсіподағының 120 жылдығына орай марапатқа ие болғандардың да қатары көп.

Мерекенің мәні сала мамандарымен бірдей, кәсібилігімен темір жолдағы қозғалыс қауіпсіздігін қамтамасыз етуге өз үлестерін қосып жүрген құрылысшы, байланысшы, тағы да басқа қарапайым жұмысшылардың да еңбектерінің еленуімен ерекшелене түсті.

Салтанатты жиында «Жамбыл жүк тасымалы бөлімшесі» филиалының директоры Айдын Сеитбенбетов, «Жамбыл магистральдық желі бөлімшесі» филиалының директоры Мейрамбек Кенжебаев, теміржолшылар кәсіподағы Жамбыл филиалының төрағасы Ерболат Жидебаев сала мамандарын мерейлі мерекемен құттықтап, еңбектеріне қарай марапаттарын табыс етті.

– Біз жақында ғана күзгі комиссиялық тексеруді аяқтап, қорытындысын шығарған болатынбыз. Маусымаралық кезеңге үлкен жауапкершілікпен қарап, қысқа дайындық жұмыстарын тиянақты өткізген бес еңбек ұжымын атап өтіп, мерейлі мереке қарсаңында марапаттауды жөн көрдік. Бұл басқа құрылымдарды да ынталандыра түсері анық, - дейді «Жамбыл жүк тасымалы бөлімшесі» филиалының директоры Айдын Пайзылдаұлы.

Мерекелік іс-шарада Жамбыл локомотив пайдалану депосы филиал директорының Құрмет граматосымен марапатталып, үздік атанған еңбек ұжымдарының көшін бастады. Тиянақты жұмысымен көзге түскендер қатарында Қорағаты, Ақтаутас, Малдыбай, Қаратау станциялары да бар.  

Өз кезегінде «Жамбыл магистральдық желі бөлімшесіне» қарасты құрылымдарда табысты еңбек етіп жүргендерді де филиал директоры Мейрамбек Сермағанбетұлы Құрмет грамоталармен марапаттады.