Теміржолшылар марапатталды
Ақтөбе облысы бойынша меншікті тілші
Ақтөбеде Республика күніне арналған салтанатты шарада теміржол саласының дамуына үлес қосқан еңбек озаттары марапатталды.
«Қазақстандық салалық теміржол, автомобиль, әуе және су көлігі қызметкерлерінің кәсіби одағы» қоғамдық бірлестігінің 120 жылдығына орай төсбелгімен бір топ теміржолшы марапатталды.
Марапат иелерінің басым бөлігі — инженер мамандар. Бәрі де саланың дамуына үлес қосқан қызметкерлер.
Іс-шарада сөз сөйлеген “ҚТЖ-Жүк тасымалы” ЖШС Батыс филиалының директоры Бөріхан Беркімбаев әр қызметкерге жетістік тіледі, сенім артты.
— Республика күні - ұлттық мереке. Бұл күні елдің мемлекет ретінде қалыптасуындағы маңызды тарихи қадам. Халқымызды ынтымақ пен бірлікке үндейтін айтулы күні барлықтарыңызды қуантқымыз келді. Темір жол саласы - экономиканың күре тамыры. Ұлттық компания еліміздің транзиттік әлеуетін арттыруға, маңызды инфрақұрылымдық жобаларды жүзеге асыруға үлкен үлес қосып отыр. Біздің міндетіміз – Қазақстанды сенімді транзиттік хаб ретінде қалыптастыру, – деді Беркімбаев.
Сонымен қатар, кәсіподақ ұйымы тарапынан құттықтау тілектер айтылды.