Атыраулық теміржолшылар Республика күнін жоғары рухта атап өтті
Атырау облысы бойынша меншікті тілші
Республика күнін атыраулық теміржолшылар көтеріңкі көңіл-күймен қарсы алды. Атырау магистральдық желі бөлімшесінің акт залында мемлекеттік ту ілініп, туған ел мен жер туралы айтылған патриоттық әндер мерекелік атмосфера туғызды.
Бөлімше басшысы Аралбай Қосымбаев көпшілікті мерекемен құттықтап, бұл күні еліміздің мемлекеттілігі жолындағы алғашқы тарихи қадам жасалып, тәуелсіз Қазақстанның бірінші құқықтық құжаты – Республиканың егемендігі туралы декларациясы қабылданып, Қазақстанның тәуелсіз мемлекет ретіндегі саяси-құқықтық негізі жарияланғанын, сондай-ақ бүгінде еліміздің саяси және экономикалық салалардағы, оның әлемдік аренадағы жетістіктерін мақтанышпен атап өтті.
«Әлбетте, өткен жылдар ішінде еліміздің дамуына теміржолшылардың қосқан үлесі де айтарлықтай екендігі рас. Соның ішінде өлке темір жолының өркендеуінде аға буын мен бүгінгі еңбеккерлердің әрқайсысының қолтаңбасы жатыр. Сондықтан халықтық мереке – Республика күні құтты болсын, дендеріңізге саулық, отбасыларыңызға амандық, еңбекте толағай табыс тілеймін!», – деді ол.
Осындай игі тілекті бөлімше кәсіподақ ұйымының жетекшісі Марат Бисенғалиев та арнады. Содан кейін теміржол саласының дамуына ерекше үлес қосқан үздік қызметкерлерді марапаттауға кезек берілді. Республика күні мерекесіне орай Атырау магистральдық желі бөлімшесі жол бөлімінің жетекші инженері Айнұр Құлмағамбетова «Адал еңбегі үшін» төсбелгісін, Атырау жол дистанциясының өндірістік телім бастығы Дауыл Тауашов «Кәсібі бойынша үздік» төсбелгісін, Атырау жол дистанциясының жол шебері Жанболат Таумұрынов «Үздік жол шебері» төсбелгісін кеуделеріне тақты. Сонымен бірге «ҚТЖ» ҰК» АҚ Басқарма төрағасының Құрмет грамотасы және Алғыс хатымен бірқатар мамандар марапатталды.
Сондай-ақ көптеген қызметкерлер «Қазақстан темір жолы» ұлттық компаниясына-25 жыл» және «Достық-Мойынты» теміржол учаскесіндегі екінші жолдардың құрылысына атсалысқаны үшін арнайы медальмен марапатталды. Олардың ішінде Құлсары белгі беру және байланыс дистанциясының байланыс электр механигі Айгүл Қаламбаева, Атырау жол дистанциясының өндірістік телім бастығы Жасұлан Амиров, Атырау белгі беру және байланыс дистанциясы бастығының байланыс жөніндегі орынбасары Қамидолла Гарипов, Құлсары белгі беру және байланыс дистанциясының сигнализация, орталықтандыру және бұғаттау бригадасының электрмеханигі Аманбай Басжанов, Атырау көпсалалы қызмет көрсету орталығы басшысының орынбасары Мәншүк Мужиева, Атырау электрмен жабдықтау дистанциясының электрмонтері Еламан Тұрған және тағы басқалары бар.
Салтанатты жиын соңы магистраль майталмандарының құрметіне өнерпаз теміржолшылардың күшімен дайындалған концертке ұласты.