Шеберхана жөнделді
Ақтөбе облысы бойынша меншікті тілші
Қандыағаш жол дистанциясының механикалық шеберханасында шағын жөндеу жұмыстары атқарылады. Дистанциядағы қолдары епті мамандар жөндеу жүріп жатқан вокзалдан шыққан құрылыс материалдарын тиімді пайдаланып, шеберхананың іші-сыртын жаңартты.
Жол техникасын қарайтын, жөндейтін бұл шеберханада 56 адам жұмыс істейді. Мұндағы токарь, механик, ұста, шебер, жүргізуші, тағы басқа әр жұмысшының міндеті нақты бөлінген.
Қандыағаш жол дистанциясының өндірістік-техникалық бөлім бастығы Сәния Блимованың айтуынша, атшаптырым шеберхана іші мұнтаздай жаңарған. Қандыағаш вокзалынан шыққан ескі брусчаткалар шеберхана ауласына төселіп, әжептәуір әрлендіріп тұр. Шеберхананың сыртқы келбеті де көз тартарлықтай жаңартылған.
– Бұл – осы жерде жұмыс істейтін өз мамандарымыздың еңбегі. Өздерінің күнделікті міндетінен тыс, бір ай бойы шеберхананы ретке келтіріп, жұмыс орындарын жаңа кейіпке енгізді. Көп шығын да шыққан жоқ, вокзалдан шыққан жарамды құрылыс материалдары пайдаға жарап, ғимараттың ажары кіріп, еңсесі көтерілді, – дейді Сәния Блимова.
Ширек ғасырдан аса уақыт қызмет етіп тұрған шеберхана расымен айтарлықтай жаңарып-жаңғыртылған. Іші-сырты қайта сыланып, сатыларға кафель төселіп, қызметтік бөлмелерге косметикалық жөндеу жасалыпты. Қалауын тапса, қар жанар деген осы.
