Таза Қазақстан: Ерікті жастардың елеулі еңбегі

Жуырда Семей ЖТ бөлімшесі бойынша жалпыұлттық «Таза Қазақстан» акциясы аясында атқарылған жыл бойғы іс-шаралар қорытындыланды. Нәтиже көрсеткендей, осымен екінші жыл қатарынан қолға алынған игі істе теміржолшы жастар ұйымының еңбегі ерекше бағалануда.  

Семейлік жастар ұйымының белсенділері осыған дейін әлеуметтік салаға, соның ішінде қайырымдылық жұмыстарын жүргізуге басымдық беріп келген болатын. Ал биыл негізгі бағыт ретінде «Таза Қазақстан» акциясына күш салынды. Жастар ұйымы төрайымы, ұлттық компания бойынша өткен «100 жас есім» байқауының жеңімпазы Арайлым Қосанованың айтуынша, олар биылғы 5 сәуірден бастап акция аясындағы іс-шараларды жүзеге асыруға белсене кіріскен. Қазан айының соңында жоспардың соңғы межесі орындалған.    

– Жалпы, ағымдағы жылы Абай және Шығыс Қазақстан облыстарын қоса алғанда аға буын өкілдерімен бірге байтақ желі бойында, 79 станция және жол айрықтарындағы теміржолшылар, 2 вагон пайдалану депосы, 3 локомотив пайдалану депосы, тағы үш айналым депосы мамандарымен бірлесіп бес мыңға жуық жас көшеттер отырғызылды. Мәселен, ең соңғы қазан айындағы сенбілік шараларына 3 300 адам бір кісідей қатысты. Әлбетте, алдыңғы шепте жастар қауымы жүрді, – дейді Семей ЖТ бөлімшесі кадр бөлімінің жетекшісі  Ботагөз Мүбәракова.

Айта кетерлігі, Арайлым Қосанова бастаған теміржолшы жастардан құралған еріктілер қауымы қаладағы көптеген тазалық акциясына атсалысты. Мәселен, осыдан біраз бұрын «Бүкілқазақстандық көшет отырғызу күні» экологиялық акциясы аясында Семей қаласындағы Бейбітшілік аралындағы орман тұқымбағында қарағай көшеттерін егуге қатысты. Мақсат – Семей орманының өртенген бөліктерін қалпына келтіру және аймақтағы экологиялық тепе-теңдікті сақтау. Орманшылар мен мемлекеттік қызметкелердің қатарында теміржолшы еріктілер де сауапты іске атсалысты.  

Алдағы уақытта Жастар ұйымының  2026 жылға арналған жаңа кешенді жоспары әзірленбек. Бөлімше басшылығы, салалық кәсіподақ пен Ардагерлер ұйымының ақыл қосуымен межелі іс-шаралар бекітіліп, қаңтар айынан бастап іске асырылатын болады. Жоспарда биылғы жылдағы тәрізді экологиялық жұмыстарға айрықша басымдық берілмек. Осылай, әлемнің тек екі елінде – Қазақстан мен Канадада ғана бар қылқан жапырақты жасыл орманды сақтау ісіне үлес қоса бермек. Көшет отырғызу ісі осыдан он жылдай уақыт бұрын бөлімше басшылығы бастамасымен басталып, жыл сайын жүзеге асырылып келеді. Соңғы екі жылда ерекше қарқын алды. Тағы бір жағымды жаңалық – «Таза Қазақстан» экологиялық бағдарламасы аясында алғаш рет өңірдегі 75 мыңнан астам ағашты толық түгендеуді қамтитын дендрологиялық жоспар әзірленуде. Оған жергілікті  теміржолшылар отырғызған жасыл өскіндер де кіретін болады.