Теміржолшыларға алғашқы медициналық көмек пен азаматтық қорғаныс дағдылары үйретілді

«ҚТЖ-Жүк тасымалы» ЖШС Бас директорының тапсырмасына сәйкес, Атырау ЖТ бөлімшесінде азаматтық қорғаныстың имиджін арттыру мақсатында оқу-сабағы өтті.  

Оған барлық  станция мен локомотив депосы, басқа да құрылымдардың қауіпсіздік инженерлері мен мамандарынан 100-ге тарта адам және Атырау облысы Төтенше жағдайлар департаменті мен Медицина апаттар орталығы қызметкерлері қатысты. Олар төтенше жағдайлар кезінде іс-қимыл жасау, алғашқы медициналық көмек көрсету және азаматтық қорғаныстың маңыздылығы туралы тәжірибелік сабақтар өткізді. Атырау жүк тасымалы бөлімшесінің азаматтық қорғаныс және төтенше жағдайлар жөніндегі инженері Нұрлан Сұлтанғалиев жұмысшылар үшін бұл шараның аса маңызды екенін жеткізіп, жергілікті теміржолшылар атынан дәріс беруші мамандарға алғысын білдірді. 

Атырау облысы Төтенше жағдайлар департаментінің Азаматтық қорғаныс басқармасы мен Медицина апаттар орталығының мамандары қандай да бір зардап шеккендерге көмек көрсету қағидаларын теміржолшыларға көрнекі құралдар көмегімен түсіндірді. Ең алдымен өңірдегі қазіргідей экология нашар кезде адамдардың кенеттен жүрегі ауыру, қан қысымы көтерілу, не басқа да жағдайлардың жиілеп кеткендігі сөз болып, сондай кезде оларға алғашқы медициналық көмек көрсету, яғни жедел жәрдем машинасы келгенге дейін базалық реанимация жасау қажеттігін түсіндірді. Орталық фельдшерлері арнайы манекенді пайдаланып, ең әуелі ауырған адамды шалқасынан жатқызу, тынысын тыңдау, тамыр соғысын білу қажеттігін, науқастың кеудесінен басып дем беріп, мұрнын жауап тұрып, содан соң аузынан ауа жіберіп үрлеу қажеттігін көрсетті. Сондай-ақ адам ауырған кезде оның ішкі органдары қайсысы қалай жұмыс жасайтынын, не жасамай қалатынын, адамды оңалтып жіберу үшін қалай әрекет ету тәсілдері егжей-тегжейлі түсіндірілді. Қорыта келгенде, өмірін сақтауда алғашқы көмектің мәні зор екенін мамандар баса айтты. Теміржолшылар өздерінің көкейде жүрген сұрақтарын қойып, қанықты жауап алды. Соңынан қарапайым жағдайда әртүрлі аурудан адам өмірін сақтап қалған бейнекөрсетілімдер көрсетілді.    

– Мұндай сабақтар өндірісте жұмыс жасайтын адамдар үшін өте қажет. Темір жол стратегиялық һәм қауіпті нысан болғандықтан, азаматтық қорғанысты арттырады. Осы тұрғыда мамандардың бүгінгі сабағынан қатысушылар өздеріне қажетті пайдалы мағлұмат алды деп ойлаймыз, – дейді бөлімшенің азаматтық қорғаныс инженері Н.Сұлтанғалиев.