Ақтөбе өңірінде теміржол инфрақұрылымын жаңарту қалай жүріп жатыр
Ақтөбе облысы бойынша меншікті тілші
Ақтөбе магистральдық желі бөлімшесі өткен жылы аймақтағы жол сапасына баса назар аударды. Инфрақұрылымды жаңарту, жолдарды күрделі жөндеу, қауіпсіздікті арттыру бағытындағы шаралар жүйелі түрде іске асырылды.
Ақтөбе бөлімшесіне Шалқар, Бершүгір, Қандыағаш, Никельтау, Ақтөбе, Орал сынды алты жол дистанциясы қарайды. Сонымен қатар 4 белгі беру дистанциясы, 2 электрмен жабдықтау дистанциясы бар. Өрт сөндіру және қалпына келтіру пойыздарының жұмысы да осы жерден ұйымдастырылып, үйлестіріледі.
Жалпы ұзындығы 2500 шақырымнан асатын бөлімшеге қарасты жол жағдайы қанағаттанарлық, жоспардағы 60 балдық жүйе 51 балдық деңгейге жеткізілген. Бөлімшеде соңғы жылдары жол күтімі мен пайдалану сапасы айтарлықтай жақсарған.
2025 жылы бөлімшеде ауқымды жөндеу жұмыстары жүргізілді. 72,552 шақырым жол күрделі жөндеуден өтті. Соның ішінде Никельтау жол дистанциясы – 21,1 шақырым, Ақтөбе жол дистанциясы – 21 шақырым, Қандыағаш жол дистанциясы – 19 шақырым, Шалқар жол дистанциясында 11,4 шақырым жол толық жаңартылды.
– Жоспарлы күрделі жөндеу мен бұрмалар ауыстырылып, мал қоршаулары салынды, құммен күрес жүргізілді. Сонымен қатар байланыс және электр желілері жаңартылып жатыр. Жұмысшылардың еңбек жағдайын жақсарту, қауіпсіздікті сақтау бағытында да нақты шаралар бар. Мамандардың кәсіби шеберлігін арттыру үшін жоспарлы техникалық сабақтар тұрақты жүргізілуде. Сабақтарда қысқаметражды видеороликтер мен ситуациялық схемалар көрсетіліп, нақты мысалдар арқылы түсіндіріледі, – деді бөлімше директорының пайдалану жөніндегі бірінші орынбасары Темірғали Куштаев.
Бөлімше бастығы орынбасарының айтуынша, 2026 жылы 57 шақырым жолға күрделі жөндеу жүргізу жоспарланған. Жөндеу жұмыстары Орал, Никельтау, Қандыағаш және Бершүгір жол дистанцияларында жалғасады.