Азаматтық қорғаныс – қауіпсіздік жүйесінің ажырамас бөлігі

Жамбыл жүк тасымалы бөлімшесінде «Азаматтық қорғаныстың оң имиджін қалыптастыру және арттыру» тақырыбында дөңгелек үстел отырысы өтті. Бас инженер Дүйсенбек Сыдықов модераторлық еткен жиынға жүк тасымалы мен магистральдық желі бөлімшелерінің бас инженерлері, азаматтық қорғаныс саласының жауапты мамандары қатысты.

Азаматтық қорғаныс мәселесі маусымдық жұмыс емес. Бақылауды босаңсытпай, күнделікті қадағалауды қажет етеді. Сондықтан ұлттық компанияның қос филиалының басшылары осы бағытта жүйелі жұмыс жүргізілуін назарда ұстап, табиғи және техногендік сипаттағы төтенше жағдайлардың алдын алу және жою жөніндегі іс-шаралардың қызметін үйлестіріп отырады. Бұл бағытта атқарылатын жұмыстар ең алдымен сала мамандарының орнықты қызметін қамтамасыз етуге бағытталатынын атап өткен Дүйсенбек Тұрсынбайұлы: «Азаматтық қорғаныс іс-шаралары алдын ала жоспарланады. Бейбіт уақыттағы және төтенше жағдайларға қарай екіге бөлінеді. Бұған мекеме басшылары тікелей жауапты», – деп түсіндірді жалпы жұмыс жүйесін.

Жамбыл магистральдық желі бөлімшесінің бас инженері Дастан Садықов төтенше жағдайлар кезінде теміржолшыға жүктелер жауапкершілік жоғары екеніне тоқталды.

– Әрбір теміржолшы, әрбір маман төтенше жағдай туындаған кездегі іс-қимылдар алгоритмін білуі тиіс. Кейбір апаттар кезінде темір жол құтқару қызметін атқарады. Ал салалық құрылымдар мамандары құтқарушы ретінде жұмылдырылады. Бұдан бөлек мекемелер ішіндегі қызметкерлер қорғану тәсілдерін меңгерумен қатар, эвакуациялық іс-шараларды жүргізуге дайын болуы керек. Дайындықтың мұндай деңгейі тосын факторларды азайтып, болдырмауы мүмкін, – дейді Дастан Ербайұлы.  

Азаматтық қорғаныс іс-шараларын орындау және жоспарлауда командалық әрекеттер тиімді саналатыны белгілі. Жамбыл магистральдық желі бөлімшесі филиалының азаматтық қорғаныс жөніндегі жетекші инженері Қайрат Ахаев өз баяндамасында бұл тәсіл басшылар мен мамандарға бірлескен жоспарды кедергісіз жүзеге асыруға мүмкіндік беретініне тоқталды. Оқу-жаттығулар кезінде топтық жұмысты дұрыс ұйымдастырудың апат туындаған жағдайды жоспар бойынша әрекет етуге тигізер пайдасы көп екенін атап өтті.  

– Төтенше жағдай туындағанда нақты жағдайға сай, уақыт факторының ерекше маңыздылығына байланысты құтқару және шұғыл жұмыстарды жүргізуге қатысатын барлық адамдардың іс-әрекеттерін нақты үйлестіру қажет болатыны түсінікті. Ал мұндай деңгейдегі дайындыққа оқу-жаттығулар өткізу арқылы қол жеткізе аламыз. Бұл іс-шаралардың барлығы Ішкі істер министрлігінің 2020 жылғы №494 бұйрығының негізінде азаматтық қорғаныс және төтенше жағдайлар желісі бойынша жүргізіледі. Біз жыл сайын кәсіпорындарда, станцияларда осындай дайындық іс-шараларын өткізіп тұрамыз. Азаматтық қорғаныстың ұйымдастыру, инженерлік-техникалық іс-шараларды уақытылы орындауы төтенше жағдайлар кезінде құрылымдық бөлімшелер мен станциялардың тұрақты жұмыс істеуін қамтамасыз ету және зақым келтіруі мүмкін факторлардың әсерін азайтуы мүмкін, – деді Жамбыл жүк тасымалы бөлімшесі азаматтық қорғанысты ұйымдастыру және жүргізу бойынша І санатты инженері Аман Беспаев.  

Қауіпсіздікті қамтамасыз етуде әрбір жоспарлы жұмыс жүйелі жүргізілуі қажет. Мамандар азаматтық қорғаныстың оң имиджін қалыптастыру – теміржол саласының үздіксіз әрі тиімді жұмыс істеуінің басты шарты екенін алға тартты. Сол себепті өңірлік бөлімшелер жауапты қызметкерлерді азаматтық қорғаудың республикалық оқу-әдістемелік орталықтарына жіберіп, біліктілікті арттыру курстарынан өтуін қамтамасыз етіп отырады.