Инфрақұрылым қауіпсіздігі күшейтілді

Ақтөбеде теміржол желісінің электрмен жабдықтау жүйесі жаңартылып, пойыздар қозғалысының қауіпсіздігі артты. Электромонтерлердің еңбек жағдайын жақсарту мақсатында дистанция паркі қарда жүретін бірнеше техникамен толықты.

Ақтөбе электрмен жабдықтау дистанциясының бастығы Сәкен Орынбаевтың айтуынша, өткен жылы нысандардағы жарықтандыру желісі жаңартылып, электрмен қамту жүйесі жетілдірілді. Бұған қоса дистанция жергілікті атқарушы органдармен бірлесіп, ҚТЖ-ға қатысы жоқ, жеке тұлғалардың иесіз желілерін коммуналдық меншікке өткізу жұмысын атқарды. Нәтижесінде 387 нысан жергілікті органдар балансына берілді. Бұл қадам теміржолшылар жүктемесін азайтып, негізгі мақсат – теміржол инфрақұрылымының қауіпсіздігі мен тұрақты электрмен жабдықтауға басымдық беруге жол ашты.  

Дистанция бастығының айтуынша, өткен жылы бұдан басқа да бірқатар іргелі істер атқарылған. Және бұл жұмыстар алдағы уақытта жалғасын табады. Пойыздардың үздіксіз қозғалысын қамтамасыз ету мақсатында жарықтандыру желісі жаңартылып, трансформаторларға уақытылы қызмет көрсетіліп отыр. 10 кВ автоблоктау және бойлық электрмен жабдықтау жоғары кернеулі әуе желілері күнделікті бақылауда.  

– Өткен жылы Ақтөбе электрмен жабдықтау дистанциясының электр желілеріне теміржолшыларға арналған 8 жаңа тұрғын модульдік ғимарат қосылды. Осы ғимараттарды электрмен жабдықтау мақсатында Ақтөбе электрмен жабдықтау дистанциясы тарапынан 4 жаңа жиынтықты трансформаторлық қосалқы станция орнатылып, сондай-ақ 4 дана күштік трансформатор қуаты жоғары жаңа күштік трансформаторларға ауыстырылды, – деді Сәкен Орынбаев.

Сонымен қатар 2025 жылы Ақтөбе электрмен жабдықтау дистанциясына көптен күткен 3 бірдей қарда жүретін техника жеткізілді. Бұл техника қыс мезгілінде қатты аяз, желі күшті әрі қолжетімділігі күрделі аумақтардағы учаскелерге қызмет көрсету үшін аса қажет. Оның бірін электромонтер Қанат Нысантаев пайдаланып жүр. Ол Жазық пен Сарысай станциялары аралығындағы учаскеге жауапты.

– Жұмысымыздың басым бөлігі далада өтетіндіктен осындай қыс мезгілінде қарда жүретін әмбебеп техниканың қажеттілігі орасан еді. Көлік жүре алмайтын жерлерге де еркін барамыз. Бұрын автокөлікпен немесе пойызбен аялдамаға дейін барып, жаяу түсетінбіз. Қазір учаскеге өзіміз тікелей тез жетеміз, – дейді ол.  

Қазіргі уақытта қарда жүретін техниканың көмегімен Ақтөбе электрмен жабдықтау дистанциясының қызметкерлері қызмет көрсетілетін учаскелерді тексеру жұмыстарын, сондай-ақ әуе электр беру желілеріндегі сымдарда пайда болған мұз қатпарларын тазалау жұмыстарын жүргізіп жатыр.