Семейде қауіпсіздік айлығы басталды

Ел шығысы бойынша ақпанның 2-нен наурыздың 2-не дейін созылатын «Назар аударыңыз, жолда адам» атты қауіпсіздік айлығы аясында мамандардың кәсіби біліктілігін шыңдау бойынша жұмыстар қолға алынды.

Профилактикалық іс-шараларды Семей филиалының техникалық кітапхана қызметкерлері бастады. Мекемелер бойынша ақпараттандыру жұмыстарын жүргізуді қолға алған кітапхана қызметкерлері алдымен Семей локомотив пайдалану депосына ат басын тіреді. 500-ден астам адам еңбек ететін мекемедегі басқосуға машинистер мен машинистер көмекшілері көп жиналды. Бөлімшенің ғылыми-техникалық ақпарат және сараптама бөлімінің директоры Баршагүл Омарова сөз алып, айлықтың жай-жапсары мен маңыздылығына тоқталып өтті.  

Жиында теміржол бойындағы жиі тіркелетін қауіпсіздік талаптарын бұзу фактілері талқыланып, технологиялық және орындаушылық тәртіптің бұзылуының алдын алу мәселелері кеңінен сарапқа түсті. Сонымен қатар локомотив бригадаларының жауапкершілігін арттыру бойынша арнайы нұсқаулықтар жайлы да сөз болды.  

– Ешбір өндірістік тапсырма адам өмірі мен денсаулығынан жоғары бола алмайды. Бұл ретте темір жолдағы қауіпсіздік мәселелері бойынша формальды көзқарасқа жол берілмейді. Техникалық кітапхана қызметкерлері ұйымдастырған іс-шара барысында осындай көптеген жайттар сөз болып, кейбір өзекті мәселелерді өзара сарапқа салдық, – дейді ТЧЭ24 мекемесі кәсіподақ ұйымының төрағасы Серік Дүйсенбаев.  

Сонымен қатар «Маман күні» іс-шарасына орай теміржол көлігіндегі қауіпсіздік мәселелеріне байланысты аса маңызды ақпараттарды қамтитын мерзімдік басылымдар мен әдебиеттерден тұратын арнайы көрме де назарға ұсынылды.