Жолаушылар жолда қалмады
Ақтөбе облысы бойынша меншікті тілші
Ақтөбе облысындағы ауа райы күрт нашарлап, автожолдар жабылды. Жолда қалған жүздеген жолаушыға теміржолшылар көмекке келді.
«ҚТЖ-Жүк тасымалы» Ақтөбе филиалы жергілікті атқарушы органдармен бірлесіп, шамамен 400 адамды жолаушы пойыздарына тегін отырғызу жұмыстарын ұйымдастырды.
– Табиғаттың тосын мінезінен туындаған форс-мажор жағдайға байланысты қар құрсауында қалған барлық жолаушыға көмек көрсетілді. Алдымен «Маңғыстау-Орал» пойызына 150 адам мінгіздік. Кейін «Ақтөбе-Атырау» пойызына 60 адам және «Ақтөбе-Маңғыстау» пойызына Ақтөбе мен Қандыағаш бағытына бет алған тағы жүзден аса жолаушыны жайғастырдық, – деді Алға станциясының басшысы Аян Жылқайдаров.
Сонымен қатар жолаушылардың қауіпсіздігін қамтамасыз ету мақсатында жергілікті атқарушы орган тарапынан да күшейтілген ұйымдастыру жұмыстары атқарылған. Алға қаласындағы №1 орта мектеп базасында арнайы жылыту пункті ұйымдастырылып, 130-ға жуық жолаушы жатын орын, ыстық тамақ және қажетті тұрмыстық заттармен толық қамтамасыз етілген.