Электр желілері мен байланыс жүйесі жаңартылды
Атырау облысы бойынша меншікті тілші
Болат жолдың бойында күні-түні жүйткіп жүріп жатқан пойыздардың қауіпсіздігін сақтау үшін жол сапасы жоғары, байланыс бекем, электр желісі мықты болуы маңызды.
Әрине көнермейтін нәрсе жоқ, сондықтан құрылғы-құралдарды жаңартып, жөндеп, реттеп отыру қажеттігі де түсінікті жағдай. Атырау магистральдық желі бөлімшесінің бас инженері Амангелді Рахмиденовтің мәліметіне сәйкес, өткен жылдан бері тұзды шөгінділерге ұшыраған учаскелерде электрмен жабдықтау нысандарының сенімділігін арттыру мақсатында бірқатар жұмыстар атқарылыпты. Атап айтсақ, Атырау электрмен жабдықтау дистанциясының 2023- 2027 жылдарға арналған жол картасына сәйкес ВЛ-10 кВ АБ ПЭС әуе желісінің 30 темірбетонды бағаны, 30 дана траверс, 300 дана ШФ-10 оқшаулағышы, ШС-20- ға, 45 шақырымдық ПСО сымдары АС-35 сымдарына ауыстырылған.
Сондай-ақ әуе электр желісіндегі сигнал беру және блоктаудағы көлденең тіректерді және оқшаулағыштарды ауыстыру жұмыстары да аяқталып, электрмен жабдықтау, сигнал беру және байланыс құрылғылары нормаға сәйкестендірілген.
Сонымен қатар өндірістік жағдайларды жақсарту және еңбекті ұйымдастыру деңгейін арттыру мақсатында мердігер мекемелермен келісімшарт негізінде 1 ғимарат (ЭЧ-4) ағымдағы жөндеуден, 1 ЭЦ посты (ШЧ-9) күрделі жөндеуден өткізілді. Атырау жол дистанциясының өз күшімен Сағыз станциясында жаңа табельдік ғимарат салынып, Боранқұл станциясында табельдік ғимарат жөнделген. Аққыстау, Ганюшкино, Туманное станцияларында орналасқан табельдік ғимараттарға ауыз су құбыры жүргізіліп, Ганюшкино станциясындағы жылу қазандығының құбырлары ағымдағы жөндеуден өткізілді.
Сол секілді байланыс саласын модернизациялау бағытында ШЧ-8 Атырау, ШЧ-9 Ақжайық сигнализация және байланыс дистанцияларына қарасты Атырау, Махамбет, Мақат станцияларының Электрлік орталықтандыру кешенінде қызмет ету мерзімі өткен қуат панельдерін ауыстыру жұмыстары, Бейнеу, Исатай станцияларында вокзал ғимаратын күрделі жөндеу жұмыстарының жүргізілуіне байланысты вокзал ішінде орналасқан Электрлік орталықтандыру кешенін (Пост ЭЦ) жаңа ғимаратқа көшіру жұмыстары жүргізілген.