Амал келді, жыл келді...
Маңғыстау облысы бойынша меншікті тілші
Батыста кеңінен аталып өтетін Амал мерекесін маңғыстаулықтар жылдағы дәстүр бойынша Отпан тауда «Бірлік» отын жағып қарсы алды.
Алыс-жақын елдерден келген қонақтар түбек халқының бірлігі мен ұлттық дәстүрлерін көріп, қаладан қашықта, теңіз деңгейінен бес жүз метр биіктегі таудың басына жиылған жұрттың ықыласына тәнті болды.
Тағылымды іс-шаралардың тартымды өтуіне түбек теміржолшылары да атсалысты. Олар Наурызнама онкүндігінің алғашқы күнін «Амал келді, жыл келді...» деп әдеттегідей бір-бірін құттықтап, төс қағыстырып, көрісуден бастады. «Бір жасыңмен, жыл құтты болсын...» деген игі тілектерін жаудырып, жастары үлкендерге көрісе кіріп, алғысын алды.
Түбек теміржолының бас ғимаратында таңсәріден осылай қол алысып, төс қағысып, амандық-саулық сұрасудан мәре-сәре болған теміржолшылар әрі қарай ақ дастархан басына жиналып, ұлттық тағамдардан дәм татты. Бір шатырды бөлісіп, бір саланың жүгін бірге көтеріп отырған Жүк тасымалы және Магистральдық желі бөлімшелерінің қызметкерлері ұлттық дәстүрді ұлықтауда да ауызбіршіліктің үлгісін паш етті. Бөлімшелер бір-бірімен құда болып, қазақи дәстүрдегі тойдың салт-жоралғыларын көрсетіп, көпшілікке көтеріңкі көңіл-күй сыйлады. Той ақсақалы – орталық теміржолшылар кәсіби одағының өңірдегі өкілі Сәрсенбай Есенқұлов жыл басы наурыздың бастауы Амал мерекесіне тілек айтып, бата берді.
Тек бөлімшеде ғана емес, оған қарасты аймақтағы барлық мекемелерде Амал күнін атап өту, көрісу рәсімдері өтіп, көздің жауын алған ұлттық киім киген теміржолшылар наурыз тойын бастады.