Ертіс жағалауындағы сенбілік
Абай облысы бойынша меншікті тілші
Өткен сенбі күні «Самұрық-Қазына» АҚ компаниясына қарасты барлық ұжымдар тобы арасында бастау алған «Мөлдір бұлақ» экологиялық акциясына шығыстағы теміржолшылар да үн қосты.
«ҚТЖ – 100 жас есім» жобасының жеңімпазы, қоғам белсендісі, Семей станциясының бас инженері Бекзат Кәрімханов бастаған жастар қауымы бұл күні Семей қаласының іргесіндегі тарихи мекен – Затон аумағындағы Ертіс жағалауында сенбілік өткізді. Ертістің бойы ен тоғай, ен тоғайдың ішінде үлкенді-кішілі бұлақтар мен бастау-көздер бар. Көпшілігі қоқыс басып, құм көміп, тартылуға таяп, сыз тартып жатыр. Жас теміржолшылар міне, осынау аймақта тазалық жұмыстарын жүргізіп, біттелген бұлақ көздерін ашып, өзен жағасынан қапқап күл-қоқыс шығарды.
Іргелі шараға теміржолшылар керек-жарақтарын алып, толыққанды даярлықпен келді. Арнайы эколог маманның жетекшілігімен техникалық қауіпсіздік талаптарын сақтай отырып жұмыс жүргізген жастар қауымы таңнан кеш батқанға дейін ауқымды жұмыс жасады.
– Бүгінгі өткізілген шара алдағы экологиялық тазалық шараларының бастамасы ғана. Алдағы сенбі күні желі бойына, белгіленген аумақтар бойынша сенбіліктер өткізетін боламыз. Ал, «Мөлдір бұлақ» эко-акциясы жыл бойына жүргізілетін болады. Жасыл орманы, өзен-көлдері мен бұлақ көздері көп біздің аймағымыз үшін бұл өте керекті әрі дер кезінде қолға алынған шара болып отыр. Ол бағытта арнайы жоспар әзірленіп жатыр, – дейді Жастар ұйымының төрайымы Арайлым Қосанова.