Жамбылда теміржолшы-энергетиктерге арналған демалыс аллеясы ашылды

ЭЧ-21 Жамбыл электрмен жабдықтау дистанциясында жұмысшыларға арналған демалыс аллеясы ашылды. Қазақстан энергетиктер қауымдастығының Құрметті энергетигі атанған теміржолшы Ералы Төлегеновтің есімі берілген аллеяның ашылу салтанатына халық көп жиналды.

Жамбыл жүк тасымалы және Жамбыл магистральдық желі бөлімшесінің директорлары Айдын Сеитбенбетов пен Мейрамбек Кенжебаев, «Қазтеміржолкәсіп» ҚБ Жамбыл филиалының төрағасы Ерболат Жидебаев, тағы басқа салалық құрылымдық бөлімшелердің басшылары қатысқан шарада ардагер теміржолшы Ералы Төребекұлының жұбайы Әлия Төлегенова аллеяның лентасын қиып, игі іске бастамашы болған ұжымға алғыстарын жеткізді. Салтанатты рәсімнен кейін қонақтар аулаға жайылған ақ дастарханнан дәм ауыз тиіп, теміржолшылар аллеясы жасыл желекті қаланың көркіне сән беретін аймаққа айналатынына сенім білдірді.  

Аллея аумағы шағын төрт учаскеге бөлініп, 16 түп сәндік ағаш егіліп, газон төселген. Ортасында субұрқақ демалыс орнына көрік беріп тұр. Күні ертең тал-дарақ жайқалып өскенде бір сәтке аялдап, тыныстайтын саялы мекенге айналып шыға келері анық.  

– Аллеяға Қазақстан энергетиктер қауымдастығының Құрметті энергетигі Ералы Төлегеновтің есімін беріп, ескерткіш тақта орнаттық. Өткен жылы өмірден озған Ералы Төребекұлы осы дистанциядағы еңбек жолын қарапайым монтер болып бастап, аға механик, бас инженер болып, бір жерде табан аудармай 34 жыл еңбек еткен білікті маман. Теміржол саласына сіңірген еңбегі – жас буынға үлгі.  

Басты мақсат – жұмысшыларымызға қолайлы еңбек жағдайын жасай отырып, саладағы жұмыс жүйесін қалыптастыруға, дистанцияның дамуына үлес қосқан аға буынның есімін дәріптеу, – дейді Жамбыл электрмен жабдықтау дистанциясының бастығы Қайрат Сейдулда.  

Дистанция ғимаратына Электрлендіру және энергетика департаменті басшылығының қолдауымен 2024 жылы күрделі жөндеу жүргізіліп, ауласына асфальт төселіп, айналасы абаттандырылғанын айта кету керек. Енді міне игілік жалғасын тауып, демалыс аллеясы ашылып отыр.