Кеңседен магистральға дейін: Қызылордалық теміржолшылар айналаны көгалдандыруда
Қызылорда облысы бойынша меншікті тілші
Қызылорда магистральдық желі бөлімшесінің теміржолшылары «Таза Қазақстан» тұжырымдамасы аясында қоршаған орта мен жұмыс орнының экологиялық тазалығын қамтамасыз ету үшін телім бойында және одан тыс аумақтарда да ағаш көшеттері мен гүл отырғызуда.
Көктемгі комиссиялық тексеріс барысында Қоскөл – Сексеуіл – Түркістан – Қызылорда станцияларының аралығындағы бірқатар станцияларда тал отырғызып көгалдандыру жұмыстарын жүргізген бөлімше басшыларының бастамасымен Қызылорда – Шымкент автожолының бойындағы №14 «Жасыл белдеу» учаскесінде де ағаш егу жұмыстары ұйымдастырылып, іс-шара барысында 1600 дана түп жергілікті және сәндік ағаш көшеттері отырғызылды.
– Бұдан бөлек «Таза Қазақстан» экологиялық мәдениетті дамыту тұжырымдамасына сәйкес «1 қызметкер – 1 өсімдік» ұстанымымен мекемелерде жұмыс орнын жасыл желекке айналдыру бастамасы қолға алынған. Әр қызметкер кеңсеге бір тірі өсімдік әкеліп, оған күтім жасайды. Бұл – тек кеңсені көгалдандыру емес, жасыл болашаққа бірге қол жеткізу үшін жасаған қадам. Жалпы, экологиялық айлық аясында біз болашақ үшін маңызды қадамдар жасап жатырмыз, – дейді бөлімшенің кәсіподақ ұйымының төрайымы Салтанат Махмутова.
