Сапалы жол – қауіпсіздік кепілі

Сапалы жол пойыздар қозғалыс қауіпсіздігінің кепілі екені анық. Соған орай аймақта жол шаруашылығы бойынша жолды күрделі жөндеу, күшейтілген орташа жол жөндеу, темірбетонды бағыттамалық бұрмаларды ауыстыру, пайдаға асатын бұрмаларды қайта ауыстыру, түйіспесіз рельсті және Р-50 типі- нен Р-65 типіне ескі рельстерді ауыстыру, бағыттамалардың желінуін азайту мақсатында бұрмаға протекторлар орнату, т.б. жұмыстар жүргізіліп жатыр.

– Атырау магистральдық желі бөлімшесі бойынша қолданыстағы жолдың жай-күйін бақылау мақсатында басшылық тарапынан бақылау күшейтіліп, кемшіліктерді түзету бағытында жол, байланыс, электрмен қамту саласы мамандарымен бірлескен тексерулер жүргізілуде. Қазіргі уақытта рельстің, бұрмалардың және жолдардың жағдайы үнемі назарда. Жоғарыда аталған жұмыстармен қатар қанағаттанғысыз жолдарды ай сайын кем дегенде 10 пайызға кеміту мақсатында КБ, ЖБР техникаларымен рельс асты төсемдер мен жарамсыз бекітпелерді ауыстыру, көпірлерге жақын жолдардың рельсі мен шпалдарын жаңарту, РМ машинасымен балласт астын тазарту, ДМ, ДГС, ПБР техникаларымен жолды түзету, ПРБ машинасымен рихтовка жасау, т.б. көптеген жұмыстар жүріп жатыр, – дейді бөлімше бастығының бірінші орынбасары Аманқос Жылқыбаев.  

Оның айтуынша, қозғалыс және еңбек қауіпсіздігін оңтайландыру бағытында материалдық базаны жақсарту бойынша шешімін күткен мәселелер де бар. Мәселен, 2011 жылдан бері жолдың күрделі жөндеу жұмыстары барысында шпалдар Фоссло типті бекітпелермен орнатылып келеді. Аталған бекітпе элементтерінің ескіруіне орай қазіргі уақытта Фоссло материалының рельсасты аралық төсемдеріне үлкен қажеттілік туындап отыр. Соңғы жылдары мекемеде алынған кіші механизациялар, яғни порталды көтергіш кран, жол домкраты, рихтовщик, АБ-2 электростанциясы, ЭШП ұлтандау, рельсжонғыш, рельскескіш, рельстескіш станоктар, шурупогайковерт, гидравликалық кергіш, бір рельсті арба, т.б. құрал-саймандардың мерзімінен бұрын істен шығуы орын алуда.  

Жол, байланыс, электрмен қамту дистанцияларының автопаркін жаңарту, арнайы мамандандырылған автомобильдер, жолаушы таситын, апатты жағдайларда қиын учаскелерге бара алатын жол талғамайтын арнайы көліктер де қажет.  

Сонымен қатар Атырау облысы полициясының ескертулеріне сәйкес теміржол өткелдерін жарыққа шағылысатын арнайы пластикалық құрылғылармен қамтамасыз ету де кешеуілдетуге болмайтын жұмыстың бірі.  

«Сапаға қол жеткізу үшін бірінші кезекте осы қажеттіліктерді түгендейміз», – дейді бөлімше басшылығы.