Семейлік теміржолшылар Бейбітшілік аралын көгалдандыруға үлес қосты

Семейлік теміржолшылар Мемлекет басшысының «Таза Қазақстан» бастамасы аясында тек сенбілік өткізуді ғана емес, сонымен қатар аймақты жасылдандыруды да мықтап қолға алды. Биылғы жылғы осы бағыттағы іс-шаралар жуырда салтанатты түрде бастау алды.

Абай еліне арнайы сапармен келген «Самұрық-Қазына» қорының өкілдері Семей қаласында экологиялық шара өткізіп, Ертіс ортасындағы әсем Бейбітшілік аралындағы орман тұқымбағына ағаш көшеттерін екті.  

Облыс басшылығы мен «Самұрық-Қазына» АҚ басқарма төрағасы Нұрлан Жақыпов қатысқан игілікті шараға семейлік теміржолшы жастар да үлес қосты. Бұл күні Семей ЖТ филиалының  Жастар ұйымы төрайымы, «ҚТЖ-100 жас есім» жобасының жеңімпазы Арайлым Қосанова бастаған жас буын өкілдері аралға ертемен келіп, алғы шептен табылды.    

Жалпы, осы шара барысында мыңнан астам көшет отырғызылды. Егілген көшеттердің қатарында айналаға сән берер емен, терек, шырғанақ, жөке, шәңгіш, кәдімгі шырша, үйеңкі, долана, қарағаш өскіндері бар. Бұл күні жалпы 9 түрлі тал мен әсемдік бұталар егілді.

– Мемлекет басшысының «Таза Қазақстан» экологиялық акциясы аясында биыл «Самұрық-Қазына» тобына қарасты компаниялар 5 млн түптен астам ағаш отырғызуды жоспарлап отыр. Біз үшін бұл жай ғана акция емес, жасыл желекті Семей орманын сақтап, көбейту жолындағы маңызды қадам. «Таза Қазақстан» акциясы біз үшін сонысымен де құнды. Жалпы, жасылдандыру жастар ісі дер едім, жұмыстың дені әлі алда. Мәселен, республикалық «Абайға құрмет» акциясы аясында Семей қаласында «ҚТЖ» ҰК» АҚ-ның қолдауымен денешынықтыру-сауықтыру кешені салынып, компания атынан тарту етілмек. Аумағы 3308 ш.м. болатын, құрылысы биыл басталып, 2028 жылы аяқталатын заманауи нысанның маңайын жасыл желекпен көмкеруге теміржолшы жастар қазірден білек сыбанып отыр, – дейді бұл ретте Арайлым.  

Тоқтала кетсек, соңғы екі жылда қор компаниялары 5,8 млн түп ағаш отырғызған екен. Соның ішінде бір ғана Семей теміржолы бойынша өткен 10 жылдың көлемінде 1 млн түпке жуық тал көшеттері отырғызылыпты.