«Қазақстанда жасалған» вагондарға сұраныс бар
Атырау облысы бойынша меншікті тілші
Атырау вагон құрылысы зауыты 13 сәуірде Астана қаласында өткен VІІ халықаралық машинақұрылысы және металл өңдеу бойынша «Kazakhstan Machinery Fair» көрмесіне қатысып, өз өнімдерін көрсетті.
Компания баспасөз қызметінің мәліметінше, халықаралық көрмеге қатысу Атырау вагон құрылысы зауытына өз өнімдерін әлемдік бизнес-қауымдастыққа кең түрде көрсетуге, жариялауға және жаңа іскерлік қарым-қатынастар орнатып, Қазақстан машинақұрылысы саласында өзінің сенімді өндіруші екендігін дәлелдеуге мүмкіндік туғызды.
Әсіресе мұнай өнімдерін тасымалдауға арналған жаңартылған үлгідегі 15-3237 модельді вагон-цистерналар көрмеге келген көптің назарын аударып, қызығушылық туғызған. Ал бұған дейін компания қазақстандық тауар өндірушілер реестрінде 12-6785 модельді әмбебап жартылай вагон өндіруші ретінде ресми тіркелген болатын. Енді ол компанияның нағыз отандық теміржол вагондарын өндіруші екенін айғақтайды. Соның куәсі ретінде жуырда Моңғолия мемлекетімен 7 млн долларға зауыт вагондарын сатып алу жөнінде Қазақстан – Моңғолия бизнес-форумы аясында келісім-шартқа отыру жүзеге асырылғанын айтуға болады. Атырау вагон құрылысы зауыты алдағы уақытта отандық өндірушілер жұмысына серпін беретін мұндай байланыстар ұлғая түсеріне сенімді.