Атырау дистанциясында еңбекті қорғауға арналған семинар өтті

Атырау электрмен қамту дистанциясында 28 сәуір – Дүниежүзілік еңбекті қорғау күніне орай «Жоспарлы-ескерту жұмыстары кезінде қауіпсіздікті қамтамасыз ету» тақырыбында семинар-кеңес өтті.  

Дистанцияға қарасты Атырау, Сағыз, Боранқұл, Ганюшкино, Аққыстау, Құлсары, Мақат аудандық электр тораптары мен энергодиспетчерлік аппарат мамандары, барлығы 30-ға жуық адам қатысқан семинардың мақсаты өндіріс барысында қауіпсіздікті сақтау, қуат көзін тарату жұмыстарын дұрыс ұйымдастыра білу, тәжірибе алмасу болды. Әлбетте, электрмен қамту саласы – темір жолдың ажырамас бір бөлігі. Әсіресе бағдаршамдар мен бағыттамалы бұрмалар жұмысы, ғимараттардағы бүкіл автоматтандыру қызметтері электр қуатына тәуелді. Ал электр қуатының үздіксіз беріліп тұруын қамтамасыз ететін – электромеханиктер. Сондықтан олардың біліктіліктеріне көп нәрсе байланысты.

Жиынды ашқан дистанцияның бас инженері Абай Есқалиев соңғы жылдары еңбек қорғау және өндірістік травматизм бойынша жұмыстар жүйелі жүргізіліп келе жатқанын айтты. Яғни заң нормаларын бұзу, еңбек қауіпсіздігін сақтамау, тоққа түсіп қалу, т.б. келеңсіз жағдайлар орын алған жоқ. Дистанция жеке сектордағы абоненттерден біртіндеп арылып, енді басым бағытта тек теміржол нысандарына қызмет көрсетуде. Бұл дистанция үшін тиімді, өйткені бұрынғыдай қосымша шығын жоқ. Өз қуатын өз нысандарына ғана жұмсайды. Бүгінде аудандық тораптарда резервтік фидерлер көбейтіліп жатыр. Ол ешкімге тәуелсіз, дербес жұмыс жасауға қолайлы. Оның айтуынша 2028 жылға қарай барлық электр бағандары мен желілерге күрделі жөндеу жұмыстары жоспарланып отыр.  

Семинар барысында «Трансформаторларды, қуат бағандарын кешенді тексеру және жөндеу», «Қосалқы трансформаторлардың жағдайын тексеру», «Электр қондырғылары жұмысындағы қауіпсіз жұмысты қамтамасыз етуді ұйымдастыру және техникалық шаралары», «1000 вольтқа дейінгі және одан жоғары электрқондырғыларына қатысты жеке қорғаныш құралдары мен олардың қолдану мерзімдері», «Трансоформаторға жалғанған үш фазды электр септегіштерді монтаждау»,  т.б. тақырыптарда баяндамалар тыңдалып, түстен кейін сол баяндамалар негізінде практикалық сабақтар өтті. Дистанцияның еңбек қорғау инженері Гүлжайна Жақсымбетованың айтуынша, еңбек қорғау тақырыбына арналған мұндай семинарлар мен техникалық сабақтар дистанцияда орталықтандырылған тәртіппен және аудандық тораптардың өздерінде де жиі өтіп тұрады. Соның да әсері шығар, соңғы 10 жылда дистанцияда ешқандай жазатайым оқиғалар болмаған.