Жәдігерлер – өткен күннің белгісі

18 мамыр – Халықаралық музей күні. Атырау жол бөлімшесіндегі мұражайдың ашылғанына да отыз бес жылға таяпты. Ол сол кездегі бөлімше басшысы Амангелді Селбаевтың бастамасымен ашылған.

Бірақ біраз жылдардан соң жабылып, экспонаттар әр жерде шашылып қалады. 2019 жылы сол кездегі бөлімше басшысы Мағауия Оразқұлов музейдің қажеттілігіне маңыз беріп, оған арнайы бөлме дайындатып, шашылған мұраларды қайта жинақтады. Оған қоса көптеген жаңа мағлұматтарды енгізді. Бүгінде музей Атырау магистральдық желі бөлімшесі ғимаратының төртінші қабатында орналасқан.  

Мұражай 4 залдан тұрады. Онда өлке темір жолының тарихынан сыр шертетін біраз көне экспонаттар қойылған. Әр залда темір жолға қарасты мекемелерге арналған экспонаттар, бұрыштар, стендтер орналасқан. Алдымен көне вагон, цистерна, теміржол көпірі макеті көзге түседі. Бұлар мұражай бөлмесінің тура ортасында тұр және әйнекті шкафтар ішінде де пойыз, паровоз, тепловоздар, ескі станциялардың макеті қабаттастырыла сәнімен қойылған. Байланыстың бастапқы кезін еске түсіретін радиостанциялар, УАТС-49 сынды іздегіштер, коммутатор, телефон-телеграф аппараты, автодрезина, иінді кран, бұрма жабдығы макеттері де, теміржол карталары да бар.  

– Мынау аймақтан шыққан үш Социалистік Еңбек Ері – Л.Шахатов, Б.Кереев және А.Шүкіровтің меншік заттары, киімдері. Ал анау тұрған теміржолшы екенін танытатын әр жылдардағы арнаулы киімдер. Өлке теміржолының, бөлімше жұмысының әр жылдарынан сыр ақтаратын фотоальбомдар да бар. Соңғы уақытта қазақтан шыққан тұңғыш «Құрметті теміржолшы» Б.Орақовқа және сала майталманы Ж.Ізғұловқа арналған бұрыш ашылып, олар отбасылық жәдігерлермен толықты, – дейді музей қызметкері Базарлым Хансұлтанова.  

Музейге мектеп оқушылары, болашақ теміржол мамандығы бойынша білім алып жатқан студенттер, шалғай ауылдардан қатынаған қонақтар да келіп тұрады екен. Өйткені музейде материалдық және рухани мәдениет ескерткіштерін жинап-сақтаудың ғылыми-ағартушылық және білім-тәрбиелік маңызы зор.