Ақтөбеде 583 шақырым электр желісі жөндеуден өтті

Ақтөбе электрмен жабдықтау дистанциясында электр желілерінің тұрақты әрі сенімді жұмысын қамтамасыз ету мақсатында ағымдағы жөндеу жұмыстары жүргізілуде.

Жеті айда 583 шақырым әуе желісіне ағымдағы жөндеу жүргізілді. Жоспар 20,7 пайызға артығымен орындалды.  

Дистанция бастығының орынбасары Айбек Ақжігіт өңірде атқарылып жатқан жұмыстарды баяндады. Жеті айдың қорытындысы бойынша әуе электр желілеріне ағымдағы жөндеу жүргізудің жоспары 483 шақырымды құраған. Нақты орындалған жұмыс көлемі – 583 шақырым. Осылайша, жоспар 100 шақырымға артығымен орындалып, оның көрсеткіші 120,7 пайызды құрады.  

Төмен кернеулі әуе желілеріне ағымдағы жөндеу жүргізу жоспары да артығымен орындалған. Жеті айда 8 шақырым жөндеу жоспарланса, нақты көрсеткіш 10 шақырым болды.  

– Электр желілерінің тұрақты жұмыс істеуі үшін тіректер мен олардың іргетастарына да ерекше көңіл бөлінуде. Есепті кезеңде 60 темірбетон тіректі ауыстыру жоспарланып, оның барлығы орындалды. Сондай-ақ 18 тіректің іргетасы күшейтілді, – деді Айбек Ақжігіт.  

Желілік айырғыштарды жөндеу және қайта қарау жұмыстары да жоспарға сай. Жеті айда 23 айырғыш жөнделіп, қайта қараудан өтті. Сонымен қатар желілердегі 27 ОМ трансформаторына жөндеу жүргізілді.  

Электр желілеріндегі сымдарды ауыстыру жұмыстары да назардан тыс қалған жоқ. АС-35 және АС-50 маркалы сымдарды ауыстыру бойынша жеті айлық жоспар орындалды. Кабель желілерінде де тиісті жұмыстар атқарылғаны айтылды. 10 кВ және 0,4 кВ кабельдерді ауыстыру бойынша белгіленген жеті айлық жоспар толық орындалған. Әр бағыт бойынша 0,1 шақырым кабель ауыстырылды.  

Ақтөбе электрмен жабдықтау дистанциясының мамандары электрмен жабдықтау құрылғыларының техникалық жағдайын жақсарту және олардың сенімділігін арттыру бағытындағы жұмыстарды жалғастыруда.