Маңғыстаулық мерейлі отбасы

Маңғыстау облысының «Мерейлі отбасы – 2026» ұлттық байқауында түбекке танымал теміржолшылар отбасы жеңімпаз атанды. Мұнайлы ауданы атынан қатысып, 54 отбасының ішінен іріктеліп шыққан Әміровтер облыстық байқауда екінші дәрежелі диплом және 700 мың теңге қаржылай сыйлықпен марапатталды.

Әміровтер жанұясының отағасы Табылды Әмірұлы – Маңғыстау теміржолына зор еңбегі сіңген зейнеттегі Құрметті теміржолшы. Ерен еңбегі үшін ҚР Президентінің, ҚР Парламенті Сенатының, «ҚТЖ» ҰК» АҚ басшыларының марапатын алған, «Құрмет» ордені мен «Еңбек ардагері» төсбелгісінің иегері. Мұнайлы, Исатай аудандарының Құрметті азаматы, Алматы теміржол академиясының Құрметті профессоры атанған теміржолшы.

Отанасы Шәмшия Елмишева да теміржол зейнеткері, көп балалы ана. Қызмет бабымен станцияларға қоныс аударып жүріп еңбек еткен жолдасына қашанда сенімді серік болып, балаларын ұлттық тәрбиемен өсіріп, отбасының бірлігін сақтай білген асыл жар. Осындай ата-анадан тәлім-тәрбие алып өскен перзенттерінің бәрі де жоғары білімді, ортасына сыйлы. Жұмыста өзіндік орны мен беделі бар. Өмірде айрандай ұйыған бір-бір шаңырақтың иесі.  

Әміровтер жанұясынан барлығы дерлік теміржолшы. Үлкен қызы Арайлым Әмірова Маңғыстау магистральдық желі бөлімшесінің экономика бөлімінің басшысы, оның жолдасы Қарақат Жақанов Маңғыстау магистральдық желі бөлімшесінің бастығы. Екінші қызы Маралдым Әмірова Маңғыстау станциясында дөңес кезекшісі, күйеу баласы Сейтжан Үсен Маңғыстау сигнализация және байланыс дистанциясының аға электромеханигі. Ұлы Сәкен Әміров Ақтау теңіз портында логистика маманы. Кенжесі Жадыра Әмірова мен күйеу баласы Айбек Бимағамбетов – қызылордалық теміржолшылар.  

Әрине бұл отбасының өмір жолы теп-тегіс бола қойған жоқ. Жұрт қатарлы түрлі қиындық пен сынақтардан өтті. Табылды Әмірұлы мен Шәмшия Мұстажапқызы: «Біздің мұратымыз тәрбиелі ұрпақ өсіріп, халықтың алғысын алу болды. Сол үшін перзенттерімізге ата-баба дәстүрін, үлкенді құрметтеу, адал еңбек пен елге қызмет ету сияқты асыл қасиеттерді сіңіруге тырыстық», – дейді.