Ауырып ем іздегенше...
Ағымдағы жылдың 1-2 қараша күндері Ақтөбе бөлімшелік көліктегі қоғамдық денсаулық сақтау басқармасы «Әскерилендірілген теміржол күзеті» АҚ филиалына қарасты Шұбарқұдық, Жем, Қандыағаш стансаларындағы атқыштар командаларының кызметкерлері арасында салауаттылыққа қатысты семинар-кеңес өткізді.
Қазақстан Республикасы денсаулық сақтау министрлігінің Жол картасын іске асыру аясында санитариялық-ағарту жұмыстарын жүргізу мақсатында өткен шара барысында Ембі, Мұғалжар және Темір аудандық орталық ауруханаларындағы дәрігер-мамандарының қатысуымен «Менингококкты инфекцияның профилактикасы», «Туберкулез ауруының профилактикасы», «АИТВ және ЖИТС ауруының профилактикасы», «Жүрек-қан тамырлар ауруларының клиникасы, диагностикасы, профилактикасы» және «Эпидемиологиялық маусымда асқынған және өлім жағдайларын болдырмау мақсатында ЖРВИ және тұмау ауруына қарсы егілудің маңыздылығы» тақырыптары кеңінен сөз болып, атқыштар командалары қызметкерлерінің арасында салауатты өмір салтын ұстануды қалыптастыру, уақытылы скринингтік тексерістен өту қажеттілігі жөнінде дәрістер оқылды.
Семинар-кеңестің негізгі мақсаты: көлікте қызмет атқаратын қызметкерлердің арасында жеке бас денсаулығының жауаптылығын арттыру, менингококкты инфекция, туберкулез ауруы, АИТВ және ЖИТС ауруларының жұғу қауіптілігі, жүрек-қан тамырлары ауруларының клиникасы, диагностикасы, профилактикасы және ЖРВИ мен тұмау ауруының профилактикасы жөнінде кең көлемде ақпарат беру болмақ.
Семинар-кеңес барысында қызметкерлер арасында туберкулез ауруының профилактикасы жөнінде анкеталық сұрақтар жүргізілді, тақырыпқа сай бейнероликтер, слайдтар көрсетілді, брошюралар таратылып, түсіндіру жұмыстары жүргізілді және стендтерге жадынамалар орнатылды.
Семинар-кеңеске әскерилендірілген теміржол күзетінің 124 сарбазы қатысты.
Төребай КЕНЖЕБАЙ