Ақтөбелік жас теміржолшы Аслан Жанұзақов пойыз апатының алдын алды
Ақтөбе жүк тасымалы бөлімшесіне қарасты Жем станциясының жас маманы Аслан Жанұзақовтың қырағылығы кімге болса үлгі. Ол түнгі ауысымда жүріп, станцияға кіреберіс теміржолда рельстің сынығын байқап қалып, қауіптің алдын алды. Осылай жылжымалы құрамдарға төнген апаттың жолын қиған 26 жастағы жас маман Аслан Жанұзақов Жем станциясында сигнал беруші болып еңбек етеді.
«Сол күні де әдеттегідей түнгі кезекшілікте болдым. Сағат 21:00 уақытында Жаңажолдан Жем станциясына жүк тиелген вагон құрамы келді. Тежегіш башмактарды орналастыра бастадым. Оңтүстігінен сегізін, солтүстігіне бесеуін орналастырдым. Олардың түгелдіктерін, орналасуын тексеріп шықтым. Сол кезде Жаңажолдан келген тепловоз тоқтады. Айналып 14-ші жолға түсті. Оңтүстік жағына орналасқан тежегіштердің төртеуін алып кері қайтқанымда 12-ші жолдан көзіме оқыс нәрсе шалынғандай болды, өтіп барып қейін қайттым, қарасам ақаулы рельс жерді қазып тастапты. Бірден кезекшілікке хабар бердім. Тепловоз кесіліп қалған жерде кідіріп, қатқан жерді терең қылып қазып тастаған. Бөлініп қалған рельс астының қазылып қалуы өте қауіпті. Тепловоз жолдан шығып кетуі әбден мүмкін. Сол себепті бұл бірден жоғарыдағы мамандарға хабарланып, қалпына келтіру жұмыстары дереу жүргізілді», – деді ол оқиға туралы сұрағанымызда Аслан.
Осы Жем станциясында туып-өскен жігіт 2011-2016 жылдар аралығында теміржолда жұмыс істеп, Ақтөбе қаласындағы көлік және коммуникация колледжін бітіреді. Сосын басқа саланы да көрмек болып кәсібін ауыстырады. Бірақ, басқа жұмысқа «жерсінбейді», қайтадан үйренген теміржолға кеткісі келген де тұрған.
– Биылғы жылдың ақпан айынан бастап Жем станциясында сигнал берушімін. Алғашында 1-2 ай оператор болып жүріп, сосын штатқа сигналшы болып ауыстым. Қауіпсіздікке қызмет ететін жұмысым өзіне ұнайды, – дейді қырағылығының арқасында ақау тапқан Аслан.
Ардақ ЕРУБАЕВА, Жем станциясы