Шымкенттік теміржолшылар рельстер мен шпалдардың жай-күйін тағы бір тексерді
Шымкент жол дистанциясы бастығының орынбасары Н. Бастаровтың басшылығымен жолшылар қауымы қысқа кірер алдын жол табанын тағы бір тексеруден өткізді.
Желтоқсан айының басында дистанция жұмысшылары негізгі бас жолдардан – 109,3 шақырым, станция жолдарынан – 22,7 шақырым, бағыттама бұрмалардан – 79 жиынтық, екінші тексеруде негізгі бас жолдардан – 106,5 шақырым, станциялық жолдардан – 39,4 шақырым, бағыттама бұрамалардан 140 жиынтықты түгел мұқият қарап шықты. Айта кетейік, күрделі жөндеуден мерзімі өткен шақырымдар ақаутапқыш арбалардың көмегімен тексерілді.
Сонымен қатар дистанцияның бас инженері Н. Жарылқаповтың жетекшілігімен 1,2, 3, 4,5, 6, 8, 10, 12, 14 жол айналымдары мен 16, 17, 18, 19 цехтар тексеруден өткізіліп, қауіпсіздігіне мұқият көңіл бөлінді.
Өздері «қыс алдындағы емтихан» деп атаған жұмыстарды атқару кезінде теміржолшылар жолдың шпал асты лайланған учаскелерін анықтады. Бұдан бөлек, бунақтардың бойлық бағыттағы жылжуы мен ығысуына бақылау жүргізді. Жолдан шыққан жарамсыз материалдар жиыстырылып, өндірістік-техникалық ғимараттар мен темір жол алабы талапқа сай ретке келтірілді. Түйіспесіз жолдардың температуралық режимге дұрыс бекітілуі де тексерілді. Рельс тізбегі мен ажыратқыш түйіспелердің жай-күйі, жол белгілері, сым қоршаулардың жағдайы да ұмыт қалмады. Нәтижесінде, шымкенттік жолшылар қыс маусымына жол табаны толық дайын деген қорытындыға келді.
Жансая СЫДЫҚБАЙ, Шымкент
Суретті түсірген автор