Маңғыстаулық вагон қараушылар «Бүйір рамасын бақылау» акциясына белсене кірісіп кетті
«ҚТЖ-Жүк тасымалы» АҚ барлық филиалдарында 15 желтоқсаннан бастап «Бүйір рамасын бақылау» төрт айлығы бастау алғаны белгілі. Мақсат – жүк вагондары арбасында құйма бөлшектері сынығын дер кезінде анықтап, апаттың алдын алу және пойыздар қозғалысы қауіпсіздігін қамтамасыз ету.
Айлықты өз деңгейінде өткізуге Маңғыстау вагон пайдалану депосының бүкіл ұжымы жұмыла кіріскен. Вагоншылардың жұмыс көрсеткіштеріне көз жүгіртсек, 2017-2018 жылдары оннан астам адам «Қозғалыс қауіпсіздігі үшін» төсбелгілерін кеуделеріне қадады. Депоның вагон қараушылары арасында өз міндеттерін үлкен жауапкершілікпен атқарып, жылжымалы құрамның жолдан шығып кетуіне себеп болатын күрделі ақауларды анықтағандардың аз емес екенін осыдан-ақ байқауға болады. Олардың көбісі – соңғы кезде жиі кездесетін бүйірлік рама ақауын анықтағандар. Мәселен, өткен жылы вагоншылар Ж.Тұрғанбаев букстық тораптың бұзылуын, К.Орынбаев бүйірлік раманың сынығын, Ы.Сатыбалдиев, А.Есбосынов, Б.Дүйсембаев, С.Көпейсінов букстың жылжуын анықтады. Ал, Б.Битанов букстың шашылуын, Ж.Исанов, Б.Тыныштықов, И.Елусинов, Н.Сариев бүйірлік раманың жарығын тапты.
Маңғыстау вагон пайдалану депосының техникалық қызмет көрсету пунктінің вагон қараушысы Берік Дүйсембаев 2017 жылы бүйірлік рамадан аса ірі көлемді, өте қауіпті жарық тапқан еді. Ол одан кейін де, яғни өткен жылдың наурыз, тамыз айларында екі бірдей қауіпті ақауды, жұп доңғалағы дискісінің жарығын және жұп доңғалағының букстық торабының 20 мм-ге жылжуын көрсетіп берді. Осылайша, ол өз ісінің мықты маманы, қырағы вагон қараушы екендігін талай рет дәлелдеді.
Депо директорының орынбасары Майлыбай Камалов вагон шаруашылығындағы ақаулықтардың көбінесе құйылмалы детальдардан келетіндігін айтты. Сондай-ақ ол бұл айлықтың қатаң жүргізілуі вагон депосында басты назарда тұрғандығын жеткізіп: «Қазір ауа райының күрт өзгермелі кезі. Аяз көтеріліп, жел ысқырады. Детальдар қысылады, әр түрлі деформацияларға ұшырайды. Сол үшін сол детальдарға басты назар аудару – шарт. Вагондарға жүк тиеледі, жолға күш түседі дегендей. Мәселен, осы айлық басталғалы бүйірлік рамадан бір ақау, жарықша табылды. Оны Бейнеу станциясындағы техникалық қызмет көрсету пунктінің вагон қараушысы Аманат Сұлтанов дер кезінде анықтады. Вагон Бейнеуде ағытылды», – деді.
Әсел ТАҢАТАРОВА,
Маңғыстау