Семей магистральдық желі бөлімшесі бойынша қысқа даярлық жұмыстары биыл ерте пысықталды
Семей магистральдық желі бөлімшесі бойынша қысқа даярлық жұмыстары биыл ерте пысықталған болатын. Бөлімше шаруашылығын қатал маусымға әзірлеу мақсатында №286 бұйрық аясында арнайы штаб құрылып, жүйелі жұмыс жүргізілгеннің арқасында теміржолшылар қысты қамсыз өткізуде.
Магистральдық желі бөлімшесі бастығының орынбасары Дәурен Қабастың айтуынша, қазіргі күндері бірінші кезекте теміржолшылардың жұмыс орны, қызметтік-техникалық нысандардың жылылығына баса мән берілуде. Бұл ретте НЖС-6-ға қарасты 234 ғимарат толық даярланған қалпымен қысқа кірген болатын. Яғни, орындалу деңгейі 100 пайызды құрап отыр. Аталмыш бағытта әсіресе жол шаруашылығындағы нысандар талапқа сай етілген. Мәселен, Семей жол дистанциясына қарасты 39 нысан жаздың өзінде-ақ толық жөндеуден өткізіліп, керек-жарақпен мезгілінде қамтылды. Теміржолшылар жылыну үйшіктері де қайта жаңартылған. Сол тәрізді жұмыстар Аягөздегі ПЧ-42, Жаңа-Семейдегі ПЧ-40 бойынша да уақытында іске асырылған-ды. Сондай-ақ, мұндай жұмыстар вокзал шаруашылығы бойынша да тыңғылықты жүзеге асырылып, орындалу деңгейі 100 пайызды құрады.
Штаб мүшелері мән берген негізгі шара жылу қазандықтарының қысқа әзірлігі болды. Бұл ретте бөлімшеге тиесілі Шаған, Семей, Серебрянкадағы жылу беру орындары қазіргі таңда қалыпты жұмыс істеп тұр. Техникалық көмірдің мол қоры жасақталған. Отыннан тапшылық жоқ. Айлап аяз қысқанның өзінде де қатты отын қоры толығымен жетеді деп межеленуде.
Аталмыш шаралар аясында теміржолшылардың өз күштерімен орындаған бір шаруасы жылу трассаларын жөндеу еді. Биылғы жылғы белгіленген жоспар 0,225 шақырым толық орындалып, қазіргі таңда ақаусыз жұмыс істеп тұр.
Сонымен қатар, табиғаттың қытымыр мінезіне төтеп беріп жұмыс жүргізулері үшін жолшылардың қажеттілігі түгенделіп, техникалық жабдықтар жаңаланды. Атап айтсақ, бағыттамалы бұрмаларды қар мен мұздан тазалау үшін қолданылатын үрлегіш-пневмообдувкалардан 366 бірлік жұмыс жасап тұр. Осы жұмыстар аясында жол дистанцияларына қарасты компрессор станциялары толығымен жөндеуден, қайта жабдықталудан өтіп, жолшылар игілігі үшін қызмет көрсетуде. Бұл жұмыстың өзіне тән жауапкершілігі бар. Сол себепті мамандардың барлығы да кезегімен Павлодар қаласында арнайы оқу курсынан өтіп, кәсіби біліктіліктерін шыңдап қайтыпты. Яғни, бәрінің арнайы сертификаты бар. Мұнымен қатар, жұмысшылардың барлығы жуырда ғана қатаң түрдегі аттестациялаудан өтіп, қысқы мезгілде жұмыс істеу талап-тәртібін меңгергендіктерін толық дәлелдеді.
Қыс мезгілі сынаққа толы Семей өңірінде жолшылар үшін жол техникаларының қажеттілігі орасан. Осы тұрғыда теміржол бойымен жүретін түрлі типті машиналардың 61 бірлігі қазіргі таңда желі бойында жұмыс жүргізуде. Оның сыртында қысқы маусымда пайдалану үшін қатарға қосылған 192 автокөлік те жергілікті теміржолшылардың игілігінде. Бұл ретте басшылық тарап бірінші кезекте жолшыларға кең көңіл бөлінгенін айтады. Олардың игілігінде бүгінде 88 техника бар. Ал келесі кезекте қажеттілікке орай ШЧ мен ЭЧ үшін қосымша техникалар берілген.
– «Теміржолшыны қыста сына!» деген сөз бар. Нағыз кәсіби мамандар үшін сыналатын да, шыңдалатын да кезең осы қысқы мезгіл. Сондықтан да, қызметкерлер үшін мейлінше қолайлы жағдай жасалды. Әсіресе, қысты алғаш қарсы алатын жас мамандарға ерекше көңіл бөлінді. Олардың жанына тәжірибелі мамандар бекітілген. Сондай-ақ, арнайы оқу-жаттығудан да өтті. Биылғы жылы Семей магистральдық желі бөлімшесі бойынша олардың саны 74 теміржолшыны құрап отыр, – дейді НЖС-6 бойынша жол бөлімінің бастығы Қайыргелді Ахметжанов.
Мамандардың айтуынша, желтоқсандағы алғашқы аязбен мол түскен қарды тазарту теміржолшылар үшін аздап қарбалас әкелгенмен, жалпы жағдай тұрақты, пойыздар тоқтап қалған немесе кешіккен жайттар орын алған емес. Алаңдатарлық жағдай туындаған жоқ. Қозғалыс барысы кедергісіз. «Қыс шанаңды жаз сайла!» демекші, мұның барлығы жаз бойғы жүргізілген қатал маусымға даярлық шараларының оңды нәтижесі екеніне сенімді семейлік теміржолшылар.
Қуаныш Қожаев, Семей