Мақсат – жоғары энерготиімділікке қол жеткізу
Шу аудандағы маңызды темір жол мекемелерінің бірі – «Теміржолсу-Шу» ЖШС. Жерасты суларын алып, сарқынды суларды бұру арқылы, темір жол бойындағы елді мекендерді, әлеуметтік нысандарды таза ауыз сумен қамтудан бөлек өңірдегі темір жол мекемелері мен жолаушылар пойыздарын да сумен жабдықтап отырған мекеме қызметінің шарапаты мен сауабы мол.
Соңғы екі жылдан бері Бауыржан Көкрекбаев басшылық етіп келе жатқан мекемеде бүгінгі таңда 170-ке жуық адам еңбек етеді. Ауыз су жалпы ұзындығы 207, 82 шақырымды қамтитын кәдуілгі су құбыры желілері арқылы тиісті орындарға жетіп отыратын болса, кейбір халық аз қоныстанған Шу мен Шешенқара станциялары аралығындағы бірнеше шағын станцияға су арнайы цистерналармен жеткізіледі.
Жалпы, Теміржолсу-Шу мекемесі бүгінгі таңда ірі және шағын станцияларды қосқанда 40-қа жуық елді мекенді ауыз сумен қамтып отыр. Ал, су пайдалану тарифінің сомасын Тараз қаласындағы облыс әкімдігінің табиғи ресурстар және табиғат пайдалануды реттеу басқармасы бекітеді. Тұрғындар үшін 1 метр куб ауыз суға тариф көлемі 30,12 теңге, сарқынды суға 21,00 теңгені құрайды.
Алайда, серіктестік басшысы тек үкімет қаражатына телмірмей, қосымша өзіндік табыс табуға көп көңіл бөліп келеді. Соның бір дәлелі, 2017 жылы кәсіпорын тапсырыс арқылы Шу локомотив пайдалану депосының қазандығын толық жаңартып, көгілдір отынмен жұмыс істейтін, қуаттылығы 1800 кВт болатын блокты-модульді қазандықты пайдалануға берген болатын. Жобаның құны 86637,3 мың теңге. Онда Белорусиядан алынған заманауи газ жабдығы қосымша құрылғыларымен орнатылды. Атап айтқанда, 578 метр жылу құбырлары, 100 метр электр желілері, 168 метр газ құбыры, су құбыры, автономды жағдайда қазандықты электр энергиясымен қамтамасыз етуге қауқарлы, қуаттылығы 100 кВт дизель-генератор жабдықталды. Жабдықтарды орнату жұмыстарын негіздемеге сүйене отырып, серіктестік жұмысшылары өздері атқарса, ал оны іске қосу тетіктерін Белорусия елінен келген арнайы мамандар түсіндіріп берді. Жабдыққа сатып алынған орыннан бір жылдық кепілдеме құжат берілген. Белгіленген уақыт аралығында Белорусия мамандары келіп, техникалық қадағалау қызметін жүзеге асырып отырды. Әрі қарай жұмысты жергілікті азаматтар жалғастыруда. Автоматты түрде басқарылатын бұл жабдықтың қызметін жүзеге асыратын бір-ақ адам бар, яғни бір оператор. Мұндағы басты ұстаным – заманауи үлгідегі материалдар мен жабдықтарды пайдалана отырып, жоғары энерготиімділікке қол жеткізу, жылу құбырларындағы жылу шығынын минималды деңгейге түсіру. Газ жабдығын орнатудың жүзеге асырылу мерзімі келісімшарт бойынша бір жылға жоспарланғанымен, бұл іске басшылық еткен білікті инженер, осы салада 30 жылдан астам тер төккен Т.Х.Үстеміровтің ерен еңбегінің нәтижесінде өз уақытынан алты ай бұрын аяқталып, нысан пайдалануға берілді. Бұл тұста персоналды тиімді басқару, жұмысты ұйымдастыру деңгейінің жоғарылығы мен құрамына он адам енген, білікті құрылыс бригадасының да ерекше рөлін атап өткен жөн.
Серіктестік өз қаражаты есебінен инвестициялық бағдарлама бойынша жалпы сомасы 40408,5 мың теңгеге күрделі жөндеу жұмыстарын жүргізіп, қажетті құрал-жабдықтар сатып алды. Нақты айтар болсақ, Тараз қаласында 290 метр, Шу қаласы бойынша бірнеше көшеден жалпы ұзындығы 3175 метр, Ақтаутас бекетінде 1220 метрлік су құбырларын ауыстырып, күрделі жөндеу жұмыстарын жүргізген. Сондай-ақ, 12 насос-сорғы қондырғыларын сатып алды.
– 2018 жылы «Мөлдір бұлақ-2» бағдарламасы аясында жалпы сомасы 30095,0 мың теңгеге 9 су нысанының санитарлық қорғаныс аймақтарын қоршау жұмыстарын жүзеге асырды. Өткен жылы серіктестік өзіне жоспардан тыс 6 миллионға жуық табыс көзін тауып, соның нәтижесінен биылғы жылы еңбеккерлердің жалақысы көтеріліп отыр. Ал, негізгі жылдық жоспар 12 млн теңге шамасында болатын. Бүгінгі таңда үстіміздегі жылдың да жұмыс бағыты айқындалды. Оны жандандыру үшін серіктестік қаражаты есебінен инвестициялық бағдарлама бойынша жалпы сомасы 30 150,7 мың теңгеге 1 автокран, 1 қызметтік көлік, 10 насос қондырғысы, жиынтық компьютер сатып алуды көздеп отырмыз, – дейді Бауыржан Қырықбайұлы.
Динара Батырхаирова, Шу