Байланыс саласына арналады
Қазақстан теміржолының автоматика, телемеханика және байланыс саласының тарихын түгендеп, «шежіресін» шертетін жаңа кітап дүниеге келді. 2000 дана тиражбен тараған басылым «Қазақстан темір жолындағы автоматика, телемеханика және байланыстың дамуы» деп аталады.
Кітап – темір жол автоматикасы, телемеханикасы, желілік және байланысқа қатысы бар мамандарға, ғылыми қызметкерлерге, оқу орындарының оқытушылары мен студенттеріне, сонымен қатар Қазақстан темір жол көлігінің даму тарихына қызығушылық танытушы барлық оқырмандарға арналған. Қазақ және орыс тілдерінде жарық көрген кітап авторлары – белгілі теміржол ардагері, экономика ғылымдарының докторы Нығметжан Есенғарин мен тағы бір тәжірибелі теміржолшы Қанат Сүйіндіков.
Авторлардың бірінің айтуынша, Елбасының «Рухани жаңғыру» бағдарламасы шыққан тұста бұл кітаптың да жарық көруі тегін емес. Өйткені, рухани жаңғыру тек өнер мен мәдениетте ғана емес, теміржол сынды өндірістік салаларда да болуы керек.
– Кітап еліміздің темір жолындағы белгі беру, байланыс шаруашылығының қалыптасуы және даму тарихына арналған. Онда темір жол автоматикасы, телемеханикасы, байланыс құрылғыларының құрылысы, енгізу кезеңдері мен пайдалануды ұйымдастыру мәселесі туралы және олардың даму барысы айтылады. Сонымен қатар басылымда аталған қызметтерді атқаруда басшылық еткен азаматтардың да аты аталып, әр кезеңде дистанцияларда саланы дамытуға атсалысқан мамандар жайында мәліметтер беріледі, – дейді Қанат Әнуарбекұлы.
– Аталған еңбекте ел теміржолындағы 36 ШЧ мекемесінің тарихымен қатар Қазақ темір жолы, одан кейін құрылған Алматы, Тың және Батыс Қазақстан темір жолдарының тарихы және Автоматика, телемеханика және телекоммуникациялар департаментінің кезеңдік жұмыстары жан-жақты қамтылған. 80 жылдан астам тарихы бар саланың барлық кезеңдері мен қырларын түгел қамтыған басылымның теміржолдағы ұрпақтар сабақтастығын көрсетіп, өткенге алғыс білдіре отырып, бүгінгі компания қызметкерлерінің корпоративтік рухын тәрбиелеуде маңызы зор.
Кітаптың тағы бір ерекшелігі – онда байланыс саласындағы құрылғылардың даму кезеңдері толық сипатталады. Пойыздар жіберуде басында телефон арқылы басталған жұмыстар кейін жартылай автоблокировка, толық автоблокировкалау, ДЦ, ЭЦ, микропроцессорлық орталықтандыру жүйесі болып даму процестері көрсетіледі.
Ұлан ОРАЗ
Суретті түсірген Александр ЖАБЧУК