Билетсіздер анықталды

Ақтөбеде «Адал жол» жобасы аясында «Қазақстан темір жолы» саласындағы халыққа қызмет көрсету сапасына бақылау жұмыстары жүргізілді.  

Өңірде Мемлекеттік қызмет істері жөніндегі агенттік қоғам өкілдерімен бірлесе «Билетсіз жүріс жоқ» акциясын ұйымдастырған. Нәтижесінде халықаралық бағыттағы пойыздарға билетсіз жолаушы мінгізген 3 жолсерік 7 АЕК көлемінде айыппұл төлеген.

«Қоғам өкілдерімен бірге ұйымдастырылған «Билетсіз жүріс жоқ» акциясы кезінде «Алматы-Атырау», «Москва-Ташкент», «Ташкент-Уфа» бағытындағы пойыздарға билетсіз мінген 19 жолаушы анықталды. Нәтижесінде 3 жолсерікке 7 АЕК айыппұл салынды. Сондай-ақ, рейд қорытындысы бойынша «Ақтөбе – Маңғышлақ», «Ақтөбе – Атырау», «Ақтөбе – Алматы» бағытындағы пойыздарда мүмкіндігі шектеулі адамдар үшін жағдай жасалмаған. Оларда төсек-орын жабдықтарының пайдалану мерзімі жоқ екендігі де анықталды. Осы әкімшілік құқық бұзушылық бойынша «Жолаушылар тасымалы» АҚ-на 35 АЕК айыппұл салынды», – дейді Мемлекеттік қызмет істері және сыбайлас жемқорлыққа қарсы іс-қимыл агенттігінің Ақтөбе облысы бойынша департамент басшысы Расул Медетов.

Агенттік өкілдерінің мәліметінше, 10-нан астам темір жол қызметкерлеріне қатысты тәртіптік шара қабылданған. Оның ішінде жұмыстан босатылғандар да бар.

Ардақ ЕРУБАЕВА, Ақтөбе