Турон кубогына таласты
Ақпанның соңғы аптасында Шымкент қаласындағы Қажымұқан атындағы орталық стадионда Турон бойынша Әлем кубогы – 2019 халықаралық жарысы өтті.
Осыдан үш жыл бұрын Турон бойынша Оңтүстік Қазақстан аймақтық федерациясы теміржолмен бірігіп «Локомотив» спорт клубын құрған болатын. Жарысты туронның Қазақстандағы негізін қалаушы, еліміздің құрама командасының жаттықтырушысы, турон бойынша еңбегі сіңген спорт шебері Александр Тен және Шымкент жүк тасымалы бөлімінің Ардагерлер кеңесі ұйымдастырды.
Жарысты грек-рим күресі бойынша ССР спорт шебері, Шымкент ЖТ ардагерлер кеңесінің төрағасы Нұрғали Нұртаев сөз сөйлеп ашып, қатысушыларға сәттілік тіледі. Бұдан басқа, Шымкент ЖТ бөлімінің кәсіподақ кеңесінің төрағасы Хайрулла Сәрсенов, Қазақстанның еңбек сіңірген жаттықтырушысы, спорт шебері Арман Ахашов, Файзулла Садуақасов ізгі тілектерін білдірді. Айта кетейік, жарыстың ашылу салтанатында Турон федерациясы атынан ардагерлер кеңесінің төрағасы Н.Нұртаевқа WUT профессоры атағы салтанатты түрде берілді.
Турон – Өзбекстанның ұлттық спорт түрі. Спорттың бұл түрінде шығыс жекпе-жегі, дзюдо, самбоның элементтері енгізілген, ауыр жарақат алып қалатын әдістерге тыйым салынған, адамның ерік-жігері мен ширақтығын шыңдайтын спорт. Жарысқа 160-тан астам үміткер келді. Турон кубогын иелену үшін Қазақстан, Ресей, Қырғызстан, Өзбекстан, Тәжікстаннан келген спортшылар бағын сынады. Екі күнге созылған жарыс өз мәресіне жетіп, команда бойынша Қазақстан, екінші орынды Өзбекстан, үшінші орынды Тәжікстаннан келген спортшылар жеңіп алды. Екі күнге созылған жарыс өз мәресіне жетіп, салмақ бойынша жеңіске жеткен спортшыларға жүлделер табыс етілді.
Жансая СЫДЫҚБАЙ, Шымкент қаласы
Суретті түсірген автор