Арманы асқақ ару
Аина теміржолға кездейсоқ келгендердің қатарынан емес. Бала күнінен теміржолшылар формасына қатты қызығатын ол тоғызыншы сыныпты тәмамдаған соң Тараздағы теміржол колледжінің студенті атанып, арманына бір табан жақындай түсті.
– Мамандық таңдау – бұл әрбір саналы адамның он ойланып, жүз толғанып қабылдайтын түпкілікті шешімі. Ол – оның ертеңгі болашағы, нәсібін теретін тыныс-тіршілігі. Сондықтан, әр адам мамандығын өзі таңдауы керек, – дейді бүгінде 25 жастағы жас теміржолшы Аина.
Тараз теміржол көлігі және коммуникация колледжін «Темір жол көлігіндегі тасымал және қозғалысты ұйымдастыру» мамандығы бойынша бітірген соң Жамбыл жүк тасымалы бөлімшесі басшылығының біліктілік сынағынан өтіп, жұмысқа қабылданған күн әлі күнге есінде. Сондағы қуанғаны, ал жұмыс беруші жақ оны алдымен Астанадағы көліктегі технология орталығына дуальді жүйемен екі апталық білім алуға жібергені, қиялымен өзін жарқ-жұртқ еткен форма киіп жүрген нағыз теміржолшыдай сезініп, арманы алып ұшқан...
Бас қаладан қосымша біліммен «қаруланып» келген жас осылайша 2013 жылдың қазан айында болат жолдың бойындағы қайнаған тіршіліктің ортасына қойып кетеді. Басшылық оны Аса станциясына жүк қабылдап-тапсырушы етіп жібереді. Міне, содан бері осы жұмыстың көрігін қыздырып, абыроймен еңбек етіп келеді.
– Темірдей тәртіпті талап ететін темір жол саласына бірден «тастай батып, судай сіңдім» десем, өтірік болар еді. Жүрегім қалаған кәсіп болғанмен, алғашында қиналып, қоңылтақсып, біраз толқығаным рас. Ұжымдағы әріптес аға-әпкелерімнен ақыл алып, үйренгенім көп болды, бүгінде едәуір тәжірибе жинап өсіп келемін. Мамандығымды шын мақтан ететмін, – деді Аина ағынын жарылып.
Талапшыл жас бір орында тұрып қалмай, 2014-2016 жылдары Алматыдағы М.Тынышбаев атындағы Көлік және коммуникация академиясының «Тасымалды ұйымдастыру» мамандығы бойынша оқуын жалғастырып, жоғары білімге қол жеткізіпті.
– Болашақта да қажет болып жатса, білімімді толықтырудан қашпаймын. Өйткені, еңбек жолымда осы саланың мүмкін болған белестерін бағындырғым келеді. Болашақта «Қазақстан темір жолы» компаниясының орталық аппаратында жұмыс істеуді армандаймын, – деп арманымен де бөлісті ол.
Осындай жасқа тән жігері мен құлшынысы арқасында былтыр «Жас кәсіби маман» байқауында жылдың жас маманы номинациясы бойынша үздік атанып, арнайы дипломды Астанада өткен салтанатты жиында еліміздің тұңғыш ғарышкері, Халық Қаһарманы Тоқтар Әубәкіровтің өзі табыс еткені арманшыл аруды ерекше қанаттандыра түскені анық. Осы сапарында көптеген сырлас достар тапқанын зор мақтанышпен жеткізген кейіпкеріміз жастарды теміржолшы кәсібін меңгеруге шақырады.
Жасұлан СЕЙІЛХАНОВ,
Тараз