Шымкент жол дистанциясында көктемгі тексеру жұмыстары жалғасуда

Шымкент жол дистанциясында көктемгі тексеру жұмыстары әлі жүріп жатыр. Дистанцияға қарасты жолдар мен жер төсемдері, жасанды құрылыстар, жол құрылғылары мен өндірістік-техникалық ғимараттар түгел тексерілуде.

Шымкент жол дистанциясының бастығы Н. Әлиевтің және орынбасары мен бас инженердің төрағалықтарымен, 1, 4, 6, 14 комиссиялар құрылып, околоткаларда жұмыс істеп жатыр. Комиссиялар құрамына өндірістік оқыту шебері Б.Бейсенов, инженер-электронщик Д.Саматұлы, құрылыс шебері Е.Бегажанов, жетекші инженер Д.Өмірбаева, телім басшылары Б.Маденов, К.Халымбетов, Е.Алдашев, А.Теңізбаев, техниктер А.Әлімбайқызы, Г.Омарова, М.Досқараева сынды мамандар енді.

«Көктемгі тексеру кезінде еңбекті қорғау, еңбек қауіпсіздігі жағдайлары тексеріліп, белгіленген нысанда акт рәсімдедік. Анықталған ақауларды жою, қисықтарды техникалық шартқа сәйкес келтіру бойынша іс-шаралар дайындап, кесте түздік. Анықталған ақауларды уақытылы жою жауапкершілігі комиссия төрағаларына жүктеледі. Толық қорытынды 8 мамырда белгілі болады», – деді жетекші инженер Дана Өмірбаева.

Көктемгі комиссиялық тексеруде сонымен қатар рельс тізбелерінің, ажыратқыш түйіспелердің жағдайлары, инженерлік құрылыстардың, жер төсемінің жағдайы да назарға алынуда. Әсіресе, техниктер өздеріне қатысты айналымдарда жарамсыз шпалдар тізбесін, саңылаулардың өлшемдер тізбесі, қисықтықтардың өлшемдері, жарамсыз білеулер, бекітпелер жағдайы, тағысын тағылар негізінде есептер жасап, қауіптің алдын алуды қамтамасыз етеді.

Жансая СЫДЫҚБАЙ