Алғашқы толаскездің ауқымы
Қызылорда ЖТ бөлімшесінің Қамыстыбас-Шөміш-Аралқұм станциялары аралығындағы тақ жолдың 28,3 шақырымдық теміржолды күрделі жөндеудің алғашқы толаскезі беріліп, жолдың 1 км 300 метріне отандық өнім – Р-65 маркалы жаңа рельс тізбектері төселді.
Аймақтағы жолдарды күрделі жөндеуден өткізу жұмыстарына машықтанған «Integra Construction KZ» ЖШС филиалының атқарушы директоры Дәурен Сұлтамұратов алғашқы толаскездің сәтті өткенін, жолшылардың бөлінген уақытты тиімді пайдалана білгенін мәлімдеді. Алғашқы толаскездің ауқымы жаман емес.
– Қамыстыбас-Шөміш-Аралқұм станциялары арасындағы күрделі жөндеудің алғашқы толаскезі сәтті өтті деп айта аламыз. Белкөл ПМС директоры Айдарбек Әбілдаевтың басшылығымен жөндеу жұмыстарын атқарып жатқан жолшылардың әрбірі өздеріне белгіленген жұмыстарды сапалы да уақытылы атқарды. Күрделі жөндеуге қажетті арнайы техникалар ескі рельстерді жинастырып жаңасын төсеуге қажетті УК-25/18 крандары, жол төсемін сүріп қайта жаюға жұмылдырылатын бірнеше SD22 және Ч2К маркалы ауыр тракторлар мен өзге де қосалқы техникамен толық қамтылған біздің мекеме жоспарланған уақыт аралығында күрделі жөндеу жұмыстарын толық атқаратынына сенім мол. Техникамыз толығымен жеткілікті, біздің ендігі міндетіміз – әрбір толаскезді тиімді пайдаланып, 28 шақырымдық күрделі жөндеуді кестеге сай сапалы бітіру болмақ, – дейді «Integra Construction KZ» ЖШС филиалының атқарушы директоры Дәурен Серікбайұлы.
Аймаққа бұған дейін «Жол жөндеуші» атауымен таныс болып, кейін құрылымдық өзгерістерге байланысты атауын өзгерткен ұжымның мамандары да толық, қажет кезінде жергілікті мамандардан қосымша қол күшін тарта білетін мекеменің бүгінгі тынысы да тұрақты. Себебі өткен жылдары осы Қамыстыбас станциясына дейінгі, алдыңғы жылы Қызылтам, Қаракеткен учаскелеріндегі күрделі жөндеу жұмыстарын да осы мекеме құрылысшыжолшылары атқарған болатын. Пайдалануға берілген телімдерге қатысты сын пікірлер естіліп жатқан жоқ көрінеді. Сәтін салса, Қамыстыбас-ШөмішАралқұм учаскедегі күрделі жөндеу жұмыстары да сапалы әрі уақытылы өткізіледі деп күтілуде. Толаскез кезінде участок басында тамақтанатын арнайы асхана, тынығатын орындар қарастырылып, жол жұмысшыларына барлық жағдай жасалған.