Түркістан станциясының жұмыс нәтижелері
Үстіміздегі жылдың бірінші тоқсанын Түркістан станциясының ұжымы көтеріңкі көрсеткіштермен аяқтап отыр деуге толық негіз бар. Тек бірді-екілі тапсырманың үдесінен шықпай қалғаны болмаса...
Айталық, вагонайналымы жоспары 99 пайызды құраса, есесіне, өңделген және өңделмеген, сондай-ақ, жергілікті вагон ағыны тапсырмасы 100%-дан асыра орындалған. Пойыздарды қабылдау межесі 17%-ға кем шықса, пойыздарды жөнелту, вагондардан жүк түсіру шаруалары 100% құраған. Ал станциядан жүк тиеу көлемі вагонға және тоннаға шаққанда 33 және 17 пайыздарға асыра орындалыпты.
Статистикалық жүктеменің де меже үдесінен шығып отырған жайы бар. Жұмыс паркіндегі вагондардың пайдаланылуы да ойдағыдай. Жылжымалы құрамдардың кідірісіне келсек, станция қызметкерлерінің ұйымдаса жұмыс істеуінің арқасында, бұл бағыттағы жұмыстың жүйелі жүргізілгенін көреміз. Мәселен, өңдеуден өткен транзиттік вагондардың кідіруіне орташа тәулікте 8 сағат шамасында уақыт берілсе, нақтысында ол 7,8 сағатты құраған. Өңделмеген транзиттік пойыздардың кідірісіне қатысты жоспар 122%-ға орындалған.
Сонымен қатар жергілікті вагондардың тоқтап тұруы мен 1 жүк операциясы кезінде вагондардың кідіруі 110 және 108%-дарды құраған. Түркістан станциясының қозғалыс шаруашылығына жауапты мамандары пойыздар жүрісінде қауіпсіздіктің сақталуына да айрықша ден қойып, осы бағыттағы міндеттерін бұлжытпай орындап келеді. Соның арқасында биылғы үш айда ешқандай ақауға жол берілмеген.
Жан ПЕРДЕБЕК