Жамбылдағы су тасқынын өткізуге қарсы дайындығы туралы
Қыстың ауылы әлдеқашан алыстап, көктемнің де жартысы орталады. Демек, су тасқыны қаупі сейілетін уақыт болды. Әйтсе де, биылғы көктем оңтүстік аймақта жаңбырлы болып отыр. Кейде бірнеше күн тоқтаусыз жауған нөсер жауын елді мекендерді әбігерге түсіріп, теміржолдарға да кәдімгідей қауіп төндіруде.
Жамбылдық теміржолшылар 112ден «Нөсерлі жаңбыр күтілуде» деген хабар келген сайын дайындықтарын тағы бір пысықтап, қауіпті деген тұстарды бақылауда ұстауды дағдыға айналдырған. Өйткені, еліміздің оңтүстігіндегі аграрлы аймақтардың қатарына кіретін Жамбыл облысы аумағында ірілі-ұсақты өзен, су арналары көп. Әсіресе, Қырғыз жерінен бас-тау алатын трансшекаралық өзен суларынан жылда көктемде қауіп күтіледі. Оның үстіне жауынды күндері таудағы сай-саладан төмен құлдилаған тіршілік көзінің етекке барып көлшікке айналатын кезі де осы көктемге тән табиғи құбылыс екені рас.
Дәл қазір Жамбылда жауын жауып тұрғанына аптаға жуық уақыт өтті. Төтенше жағдай қызметінің ақпараттық орталығынан желдің ұйытқуы мен нөсер жауынның қаупінен сақтандырған хабарлама тиісті органдар мен халықтың қалта телефонына күнде түсіп жатыр. Ал темір жолдағы қауіпсіздікке жауапты құрылымдар техникасын сайлап, су арналары тасыған жағдайда қолға алатын шараларды пысықтап отыр.
– Басшылықтың «Жолдардың және жасанды ғимараттардың сең жүру мен су тасқынын өткізуге қарсы дайындығы туралы» 2019 жылғы 13 ақпандағы №122-ЦЗ бұйрығына сәйкес пойыздардың кедергісіз әрі қауіпсіз қозғалысын қамтамасыз ету мақсатында атқарылуы тиіс барлық шараларды ерте көктемнен тиянақтап қойғанбыз. Сарышаған, Шу, Тараз, Түлкібас станциялары бойынша әрекет ететін су шаюға қарсы 4 пойызды жарақтап қойып отырмыз. 33 вагонға, оның ішінде 4 жабық вагонға тиісті материалдар мен инвентарларды тиеп қойдық. Сондай-ақ, төтенше жағдай бола қалған жағдайда қолданатын рельсті жиынтығы бар 4 платформа, қойтаспен толтырылған 8 платформа және жарамсыз темірбетонды шпалдары бар 17 платформа дайындалды. Мамыр айына дейін қауіптің бұлты сейілмейді, сондықтан көктемнің жартысы өтсе де су тасқынына қарсы жасақталған пойыздарды таратпай отырмыз, – дейді Жамбыл магистральдық желі бөлімшесіне қарасты жол бөлімінің 1-санатты инженері Нұрлан Бердіқұлов.
Оның айтуынша, өңірде 61 қауіпті орын анықталған. Олардың 22-сі – ПЧ-48, 14-і – ПЧ-50, 12 қауіпті нүкте – ПЧ51, 13 аумақ ПЧ-52 мекемелеріне қарасты теміржол телімдерінде екен. Бұл назардағы нүктелер бойынша тиісті мамандар мен басшылық өкілдерінің кезекшілік кестесі бекітіліп, байланыстың барлық түрімен қамтамасыз етіліпті.
– Сақтық үшін қауіп тудыруы мүмкін делінген жасанды ғимараттардың төңірегі мен көпір, құбыр, жолдың сайлы жиектері, жолға жақын тау суы сағалары, су өткізу арналары толықтай қоқыстан тазартылып, су жолдары ашылған. «Жаман айтпай, жақсы жоқ» деген, Жамбыл облыстық төтенше жағдайлар департаментінен аймақтағы ең үлкен Теріс – Ащыбұлақ, Тасөткел және Тараз қаласына тиіп тұрған қырғызстандық Киров су қоймаларының техникалық жағдайы, олардағы жиналып жатқан су деңгейі мен апаттық ағызу шаралары жайлы күнделікті ақпарат алып отырмыз. Бұдан бөлек, облыстағы темір жол магистралі желілері аумағындағы болуы ықтимал су тасқыны жағдайына қатаң бақылау қойылған, – дейді Нұрлан Бердіқұлов.
Жол бөлімінің инженері Шу, Талас және Теріс – Ащыбұлақ, тағы басқа су қоймалары мен өзен-көлдерінің үстімен өтетін темір жол көпірлері тұсынан да су деңгейі күнделікті өлшеніп отырғанын жеткізді. Күнде нөсерлетіп жатқан ауа райы жағдайында су тасқыны болуы әбден мүмкін. Сондықтан қауіптің алдын алып, дер кезінде қимылдау үшін Жамбыл ЖТ мен магистральдық желі бөлімшесіне қарасты барлық құрылымдар, ПЧ, ШЧ, ЭЧ мекемелері басшылары жағдайды тәулік бойғы кезекшілікпен қадағалауға алған.