Қызылордада жаз маусымына дайындық жүргізуде
Теміржол вокзалы – кез-келген елді мекеннің, қаланың қақпасы саналатын маңызды нысан. Оның сәулеті мен сәні, ондағы көрсетілетін қызмет сапасы жолаушының сол қала, тіпті сол ел туралы алғашқы түсінігі мен көзқарасының қалыптасуына себеп болатыны рас.
Вокзал ғимараттарын жаңғырту, ондағы қызмет сапасының талапқа сай болуын арттыру жұмыстары теміржолда тұрақты жүргізілетіні белгілі. Қызылорда магистральдық желі бөлімшесіне қарасты вокзалдар да жазғы жолаушы тасымалына дайындық жүргізуде. Қызылорда, Арал теңізі, Жосалы және Төретам станциясындағы вокзал ғимараттарының іші-сырты ағымдық жөндеу жұмыстарынан өткізілген. Ал көктемнің алғашқы айы басталысымен аймақтағы Сексеуіл, Қазалы, Шиелі және Жаңақорғандағы теміржол вокзалдары мен перрондар, платформалар вокзал шаруашылығы бөлімінің өз қызметкерлерінен жасақталған құрылыс-жөндеу бригадасының күшімен ағымдық жөндеуден өткізіліпті. Жөндеу жұ-мыстары ая сында ғимараттың ішкі-сыртқы хас беттерін ақтау, ішкі бөлмелерінде сылау, сырлау жұмыстары жүргізілген. Сонымен қатар алдағы күндерде ғимараттардың айналасына да ағымдық жөндеу және абаттандыру жұмыстары жалғасады деп жоспарланып отыр.
– Теміржол вокзалы ғимараттарын ағымдық жөндеу жұмыстарын бөлімнің құрылыс-жөндеу бригадасы жүргізуде. Қызылорда, Арал теңізі, Жосалы және Төретам вокзалдары ағымдық жөндеуден өткізілді. Ендігі кезекте Қызылорда вокзалының айналасындағы ескірген тас төсемнің орнына жаңасын төсеу жұмыстары жүргізіледі. Қажетті құрылыс заттары вокзалға жеткізілді. Сонымен қатар бөлімшенің оңтүстігіндегі Талап, Аққұм және Тартоғай станцияларындағы теміржол вокзалдарында жолаушылар платформаларына бетон төсеме төсеу жұмыстары жүргізілетін болады. Барлық ағымдық жөндеу жұмыстары бөлімнің құрылыс, жөндеу жұмыстарын жасайтын бригаданың күшімен жүргізілуде, сырттан қосымша күш жалданған жоқ, – дейді вокзалдарды жаңартып-жаңғырту жұмыстарын үйлестіруші бөлімше бастығының вокзал шаруашылығы жөнінде орынбасары Жандарбек Өтегенов.
Вокзалдардағы ағымдық жөндеу жұмыстары барысында Шиелі, Сексеуіл, Арал теңізі және Төретам вокзалдарының кіре беріс есіктерін жаңғырту жұмыстары да қатар жүргізілуде екен. Сонымен есік-терезесі жаңартылып, қабырғасы ақталып боялған, айналасы айнадай жарқыраған вокзал ғимараттары жазғы жолаушы тасымалына сақадай сай болмақ.