Коркол станциясы: Құркөл атауы қайтарылғанын қалайды
Маңғыстау – Бейнеу телімі арасындағы Коркол станциясы Опорный бекеті бағытындағы 1092 шақырымда орналасқан 5-класты шағын бекет. Мыңға тарта халық тұратын станцияда 80-ге жуық теміржолшы әр салада еңбек етіп, теміржол көлігіне қызмет көрсетуде.
Бекет бастығы Ыдырыс Ысқақұлы, Коркол – малға да, жанға да жайлы жер, теміржолдың арғы бетінде де, бергі бетінде де өріс бар дейді. Бекетте 11 жылдық мектеп, балабақша, әкімдік және мәдениет үйі, теміржол мекемелері, 4-5 дүкен орналасқан, шағын болса да түтіні түзу шығып отырған ауыл. Станция кезекшісі Берік Қашкенов Коркол бекетінде 30 жылдан астам уақыт тапжылмай еңбек етіп келе жатқан байырғы теміржолшылардың бірі. Сонау 1990 жылы Коркол бекетіне кезекші болып орналасып, содан бері бір орында үздіксіз қызмет етіп келеді. Күнделікті бекет арқылы өтетін транзиттік пойыздарды қарсы алып, шығарып салып отырған ол станция үстінен күніне 10-нан астам жүк және жолаушылар пойызы өтетінін айтады.
– Мыңға жуық тұрғыны бар Коркол бе кеті Есет ауылымен іргелес сонау өткен ғасырдың алпысыншы жылдарының аяғында салынған. Бейнеу станциясынан Тассай станциясы арқылы бұрылып кететін Маңғыстау-Алматы жолаушылар пойызынан бөлек бұл жерден Астанаға, Ақтөбеге, Атырауға қатынайтын жолаушылар пойыздары және өзбек еліне қатынайтын пойыз өтеді. Соның ішінде Ақтөбе мен Атырау бағытындағы пойыздар Корколде 2 минуттай аялдайды. Менің жұмысым, жанжақтағы №461,463 бекеттер кезекшілерімен рация арқылы байланыса отырып, келе жатқан пойыздар туралы ақпарат алу, оларды қарсы алу, арнайы ДУ-2 журналына олардың келген, кеткен уақытын және әр пойыз бен оның соңғы вагонының номерін тіркеу, кеткені туралы пойыз диспетчері мен басқа да әріптестерге хабарлап отыру, – дейді станция кезекшісі.
Бекетте Беріктен бөлек тағы 3 кезекші бар. Пульт табло арқылы жұмыс істейтін олар шағын бекеттегі арнайы ЭЦ қосыны ғимаратында отырады. Мұнда олармен қатарлас вагоншы әріптестері бар. Ал бекет вокзалы өз алдына бөлек ғимаратта.
Станция бастығы Ыдырыс Қисмановтың айтуынша, Коркол атауының бастапқы нұсқасы Құркөл болған көрінеді. Яғни, ойпат, ойлы, суы жоқ жер деген мағынада, кейін оның атауы орыс тілінде Коркол деп аталып жазылып кеткен. Яғни, бекеттің ресми атауы солай тіркеліп, ауызекі тілде Құркөл атанғанмен, құжат бойынша – Коркол. Бекеттіктер алдағы уақытта атауы тілге жеңіл, тарихи атауына орай қазақшаланғанын қалайды. Бейнеу станциясынан 53 км қашықтықта жатқан Корколде жүк операциялары жүргізілмейді. «Сондықтан жұмысымыз аса ауыр емес, десек те өткінші құрамдар жауапкершілігі жоғары екенін әрбір теміржолшы жақсы түсінеді» дейді бекет бастығы.