Тараз темір жол бекетінде пандустар жаңаруда
Қаланың басты көрнекті орындарының бірі саналатын темір жол бекетінде халыққа қолайлы жағдайдың бәрі жасалуы керек. Пойызбен сапарлап келген қонақтың қаладағы алғашқы қадамын осы бекеттен бастайтыны анық. Олардың арасында үлкен де, кіші де бар, мүмкіндігі шектеулі азаматтар да кездеседі.
Әйгілі Түрксібтің негізгі нүктелерінің бірі болып даму жолы қалыптасқан Тараз темір жол бекетінде заманның, мемлекеттің талаптарына сай жаңғырту жұмыстары жүріп тұрады. Қазір мұнда үш аптадан бері мүмкіндігі шектеулі жандардың кіріп-шығуына арналған жаңа пандустың құрылысы қолға алынған.
– Бұған дейін бекеттің негізгі кіреберісінде және қосымша қақпасында пандус болған. Бірақ, тиісті мекеменің тексерісінен кейін олардың Қазақстан Республикасы Еңбек және әлеуметтік қорғау министрлігі бекіткен №3.06-02-2012 «Ғимараттар мен имараттарды халықтың қимылы шектеулі топтары үшін қолжетімділіктің есебімен жобалау» Қазақстан Республикасының Ережелер Жинағындағы стандарттарға сай еместігі анықталып, бізге айыппұл салынған және қайтадан талапқа сай етіп салу жөнінде ұсыныс берілген. Біз Жамбыл магистральдық желі бөлімшесі басшылығына өтініш жолдап, пандус құрылысына қажетті цемент, құм, металл құбыр сынды материалдарды алдық. Сондай-ақ бөлімше өзіне қарасты құрылымдардан құрылыс бригадасын жіберіп, осыдан үш апта бұрын жұмысты бастап кеттік. Негізгі кіреберістегіні бітіріп, пайдалануға бердік. Енді бекеттің оң жақтағы қақпасы алдындағы қосымша тағы біреуін соғып жатырмыз. Бұлар жоғарыда аталған Ережелер жинағы талаптарына толықтай жауап береді, – дейді Тараз темір жол бекетінің басшысы Талғат Төлебеков.
Біз бекетке барғанда екінші пандустың құрылысы қызу жүріп жатты. Өйткені бірнеше күннен бері жауыннан көз ашпаған Тараз аспаны осы күні-ақ бір ашылып, күннің көзі көрінген еді. Бригададағы жігіттер күн райының қарайласқан осы сәтін пайдаланып, дәнекерлеу, сырлау жұмыстарына шұғыл кіріскендерін жеткізді.
Талғат Бейсенбайұлы алдағы уақытта пандустардың кіреберісіне вокзал қызметкерін шақыруға арналған байланыс құрылғыларын орнату жоспарланғанын да айтып өтті. Сондай-ақ, бекеттің алдына және сол жақ қапталына мүгедек жүргізушілердің көлігіне және инвотаксилерге арналған тұрақ орны пайдалануға берілген.
Бұдан бөлек, бекет меншігінде мүмкіндігі шектеулі жандарға арналған екі арба бар. Мұндай арбалардың екеуі Шу станциясы бекетінде, Луговой бекетінде біреуі және Сарышағанда біреуі бар екен.